Truh akŏm đei vă jê̆ 100 ‘nu bơngai tang măt ăn dôm Anih tơm, anih jang kơpal kơ Trung ương kŭm hăm khul tĕch mơdro tơ̆ dêh char Đắk Lắk. Hăm plei cheh phe đei hlŏh 560 rơbâu tân, tiu 84 rơbâu tân, sầu riêng 400 rơbâu tân păng ka hơdang vă jê̆ 51 rơbâu tân 1 sơnăm, dêh char Đắk Lắk đei tơmam jrăh jrai, pơm lăp hăm tơdrong ‘mĕh vă pơm tơlĕch, tĕch mơdro păng tĕch tơ̆ teh đak đe. Mă lei, tơdrong tĕch tơ̆ teh đak dôm tơmam đơ̆ng choh jang xa, ka hơdang tơm đơ̆ng dêh char lăp tĕch lơ ăn dôm anih tĕch mơdro tơ̆ Trung Quốc, Mi, Nhật Bản, Hàn Quốc păng EU đĕch…

Kơplăh ‘nŏh dôm anih tĕch mơdro tơ̆ dôm teh đak Hồi giáo, đei tơring Ả Rập, Malaysia, Indonesia… iŏk đei tam mă truh 9% tơmam đơ̆ng Đắk Lắk tĕch tơ̆ teh đak đe. Mĭnh lơ̆m dôm tơdrong tơm ‘nŏh jĭ yoa anih tĕch mơdro Việt Nam oei tam mă iŏk đei lơ nơ̆r tơroi găh tơdrong ‘mĕh vă tơ̆ anih tĕch mơdro Halal, dôm tơdrong hơgăt hăm tơmam đơ̆ng Halal vă pơm lăp hăm tơdrong ‘mĕh vă tĕch mơdro tơ̆ teh đak đe.