VOV4.Bahnar - Khŭl kơdră chĕp pơgơ̆r Tơdrong jang hơdoi bơ̆ jang pơrô̆ pơrôp kon pơlei dêh char Dak Lăk ‘nao pơgơ̆r Hop akŏm pơtôch Tơdrong jang hơdoi bơ̆ jang pơrô̆ pơrôp kon pơlei sơnăm 2021 păng tơlĕch tơdrong jang sơnăm 2022.

Lơ̆m sơnăm 2021, ‘moi kiơ̆ Tơdrong jang hơdoi, rim hơnĭh bơ̆ jang hlôi ming man, pôk ăn 169 pơbŭng hnam ‘mêm mơnat, hnam bôl boăl păng pơbŭng hnam tơnŏ kŏng đoan, tơgŭm djru ŭnh hnam dơnŭh vă jê̆ 2.600 tŏ yŏng kon tơrong. Rim hơnĭh jang jei tơlĕch jang kiơ̆ hlŏh 60 hơnĭh jang pơyua ăn tơpôl, khăm jĭ, ƀơk ăn pơgang ăn vă jê̆ 18.000 ‘nu kon pơlei hăm akŏp kon jên hlŏh 20 ti 400 trĭu hlak jên. Yă H’Kim Hoa Byă, Kơdră chĕp pơgơ̆r Dơnŏ anĭh jang pơrô̆ pơrôp Kon pơlei kơ Dơnŏ anih Đảng dêh char Dak Lăk, Kơdră Khŭl chĕp pơgơ̆r Tơdrong jang hơdoi bơ̆ jang pơrô̆ pơrôp kon pơlei ‘mĕh vă: Lơ̆m sơnăm 2022, rim hơnĭh bơ̆ jang sơkơ̆t hơdăh Tơdrong jang hơdoi bơ̆ jang pơrô̆ pơrôp akŏm tơ̆ tơring atăih yăih, tơring kon kông, tơring tơnap tap hăm dôm tơdrong jang, hơnih jang hơdăh, tơpă.

Tơblơ̆ nơ̆r: Amazưt