Lơ̆m 9 khei kơ sơnăm 2026, tơdrong jang mŭk drăm tơ̆ rim tơring, phương tơter đak dơsĭ kơ Đắk Lắk hơnơ̆ng vei kơjăp sơđơ̆ng; mơdro sa, tĕch mơdro, tơmang pơhiơ̆ păng dăng rôp, rong ka hơdang hlôi đei tơplih hơ iă. Đei 9 lơ̆m 15 tơring jang keh đang, iŏk đei lơ loh nơ̆r pơkăp thuê̆ ăn hơnih mong jên bơ̆ jang teh đak sơnăm 2026. Đei 6 tơring jang hiơ hiơ̆ tơlĕch kon jên teh đak tơmơ̆t jang. Lơ̆m ou, tơring Tuy An Đông tơlĕch kon jên jang 0%, tơring Xuân Cảnh vă jê̆ 30%, Xuân Lộc hloh 56,5% păng  phường Sông Cầu vă jê̆ 57%.

Mă lei, choh jang sa, hơnih jang kmăi kmŏk pơm tơlĕch tơmam drăm, tơ iung pơjing ming man hnam oei, vei lăng groi teh, ming man, tơmơ̆t jên jang oei đei lơ tơdrong tơnap tap. Tơdrong proh hơmet, hơmet pơ ‘lơ̆ng mŭk drăm teh đak mĭnh ƀar tơring oei đei tơdrong tơhlăk tơhlĭn. Tơdrong ưh kơ măh kang ƀô̆ joăt jang, kmăi kmŏk ou to tim mă tôm tong, tŏk bŏk pơm kơnê̆ truh bơ̆ jang ‘lơ̆ng, keh đang hrôih tơdrong bơ̆ jang, mă kăl hloh ‘noh lơ̆m tơdrong jang găh groi teh, pơprŏ vă jang, ming man, bơ̆ jang jên hu, tơmơ̆t jên jang păng kmăi kmŏk kơtơ̆ng ang.

Lơ̆m 3 khei hơtuch sơnăm 2026, tơdrong bơ̆ jang oei tôch kơ lơ, mă kăl tơlĕch kon jên tơmơ̆t jang, jang keh đang hơnih ming an, tơdrong vă jang. Lơ̆m jăl IV jei jing jơ ‘năr ‘mi kial hơbŭt hơbông kơtang, rŏ năng gô pơm kơnê̆ truh tơdrong jang, kơ yuơ lơ loh tơdăh ưh kơ đei trong tơlĕch jang trŏ lăp lei tơnap mă jang keh đang trong tơlĕch jang tŏk mŭk drăm.

Tơ̆ Hop akŏm, rim tơring tơbăt hlôi sơkơ̆t hơdăh tơdrong jang, trong jang kiơ̆, kiơ̆ rim khei lơ̆m jăl IV păng hơnơ̆ng dăr lăng, pơm pơkeh trong tơlĕch jang tŏk mŭk drăm. Kơdră chĕp pơgơ̆r Hơnih vei lăng kon pơlei dêh char Đắk Lắk Đỗ Hữu Huy, mă kăl lăng kơjăp rim tơring oei đei iŏk đei jơnei lơ kăl đei trong tơlĕch jang mă hơdăh vă iŏk đei tong tơlĕch ăn tŏk mŭk drăm. Ƀok tơbăt, gô hơlen KPI hăm rim kang ƀô̆ chĕp kơ̆l, mă kăl ‘noh Ƀĭ thư đảng păng Kơdră chĕp pơgơ̆r Hơnih vei lăng kon pơlei tơring."Vă vei sơđơ̆ng jang đang 10 tơdrong hơgăt jang tŏk kơ jăl khei mă 4, rim tơring athei dăr hơlen rim tơdrong hơgăt păng pơjao tơdrong ăn kơ rim kang ƀô̆, chih hơdăh khei ‘năr jang đang rim tơdrong. Anih jang Nội vụ iŏk kơsô̆ chih răk 10 tơdrong hơgăt âu păng 1,2 tơdrong hơgăt nai vă chih akŏm, pơtruh ăn Kơdră Anih vei lăng kon pơlei dêh char kĭ tơlĕch ăn  trong jang KPI jăl khei mă  4 đơ̆ng dôm kơdră anih vei lăng kon pơlei dôm xăh, phường."

Tơ̆ hơnăp đei ƀôh tơdrong ‘mi kial hơbŭt dôm khei hơtuch sơnăm 2026, rim tơring tơ ter đak dơsĭ dêh char Đắk Lắk hlôi hơmet tôm khŭl jang kơtă anih păng dăr hơlen tơring đei hơmơt ƀơm ưh kơ ‘lơ̆ng kơtang vă đei trong jang yông kon pơlei đơ̆ng hrôih. Rim xăh, phường kŭm tơlĕch trong jang vei sơđơ̆ng tơring rong ka hơdang lơ̆m đak dơsĭ păng tơ ter đak dơsĭ; vei sơđơ̆ng ăn duk, thŏng nan.

Kơdră Anih vei lăng kon pơlei dêh char Đắk Lắk athei dôm tơring athei pơjing hloi trong jang hơdăh tơroi rơđăh tơdrong kơtơ̆ng ang rim unh hnam gô athei lĕch đơ̆ng tơring krê hơmơt, gre chơ yông lĕch păng anih sơng iŏk, ưh kơ gơh lê̆ đei tơdrong ưh kơ ê, ưh kơ tom băt./.