Truh dang ei, lơ̆m dêh char Gia Lai đei 517 mã kơsô̆ tơring pơtăm, hăm hơgăt teh hloh 13.500ha. Lơ̆m ou hơgăt teh pơvih pơvăn ăn tĕch mơdro tơ̆ teh đak đe hloh 12.700 hecta. Atŭm hăm ‘noh, tơring jei đei hloh 60 mã kơsô̆ hơnih tăh ‘nŭng pơvih pơvăn ăn tĕch mơdro tơ̆ teh đak đe hăm akŏp hơnih măh tăh mong ăn dang 3.600–3.800 tân plei ‘long lơ̆m mĭnh năr. Vă pơvih pơvăn ăn ƀơk ăn mã kơsô̆ tơring pơtăm, dêh char Gia Lai hlôi năm hơlen keh đang dang 7.350 hecta chehphe kơ hloh 5.200 ŭnh hnam păng vă jê̆ 970 hecta sầu riêng kơ 712 ŭnh hnam. Vă atŏk kơtang ƀơk ăn mã kơsô̆ tơring pơtăm lơ̆m khei năr kơnh, Hơnih vei lăng Choh jang sa păng Cham char dêh char Gia Lai hơnơ̆ng iung jang kiơ̆ trong jang hơnơ̆ng, pơm hơdrol hăm dôm groi teh hlôi lăng hơlen tôm tong, dăr lăng keh đang dôm bro mir pơgar iĕ păng tơmơ̆t dơ̆ng hơgăt teh lơ̆m tơring đei hơgăt teh să, dôm tơdrong mơmat tat găh groi teh.