Lơ̆m 3 năr, Hop akŏm đei 5 hla ar roi tơbăt pơma dơnuh, 79 ‘măng tơgop nơ̆r pơma dơnuh, akŏm lơ̆m pơtôch jăl jang  2020 – 2025; hơlen lăng kơdih tơdrong chĕp kơ̆l đơ̆ng Khŭl chĕp kơ̆l jăl so; băt hơdăh tơdrong hơgăt, hơnăp jang, tơdrong jang tŏk ‘lơ̆ng ăn jăl jang ‘nao; tơgop nơ̆r ăn Hla ar chih kăl Hop akŏm XIV kơ Đảng; pơdrơ̆ng kiơ̆ tơdrong Tơchơ̆t păng Tơdrong bơ̆jang.

Bí thư Anih jang Đảng dêh char Nguyễn Đình Trung pơma hơdăh, lăp đơ̆ng rŏng Hop akŏm, pơđĭ Đảng bộ gô tơlĕch jang tơdrong Tơchơ̆t, akŏm 8 grŭp trong jang, 3 tơdrong jang tŏk ‘lơ̆ng, lăng kăl pơjing Đảng, khŭl kơdră chĕp kơ̆l, tơdrong jang chĭnh trĭ pran kơjăp. Lơ̆m noh, tơgŭm hơdrol ming man trong nơnăm, hơtŏk tơiung tơmang lăng, pơjing dôm tơring tơmang lăng vă pơm tơdrong ‘lơ̆ng pơtrŭt hơtŏk tơiung mŭk drăm - tơpôl păng joh ayŏ kơ dêh char.