VOV4.Bahnar - Kơ sơ̆ ‘năr (9/9), Khŭl bơ̆ jang kơ Anih pơ gơ̆r jang Trung ương pơ tôch 10 sơ năm jang kiơ̆ Tơ drong tơ chơ̆t kơ sô̆ 09/2011 đơ̆ng Anih tơm Chĭnh trĭ găh pơ jing păng hơ tŏk ‘lơ̆ng hơ năp jang đơ̆ng khŭl jang mơ dro sa Việt Nam lơ̆m khei ‘năr tŭn pran kơ măy kơ mŏk ‘nao, hơ gei păng mơ̆t jang hơ dai hăm apŭng plĕnh teh hlôi đei jơ bơ̆ jang hăm dêh char Dak Lak găh tơ drong jang kiơ̆ Tơ drong tơ chơ̆t kơ sô̆ 09 lơ̆m dêh char. Dak Lak dang ei đei hloh 11.100 anih jang mơ dro sa tŏk bŏk bơ̆ jang, akŏp jên pơm hla ar hloh 84.000 ti hlak jên, tŏk vă jê̆ 2,7 ‘măng găh kơ sô̆ păng 2,1 ‘măng găh jên jang lơ̆m 1 anih jang mơ dro sa pơ têng hăm sơ năm 2011.

Tơ̆ jơ bơ̆ jang, dêh char Dak Lak athei rim anih tơm, anih jang Trung ương tơ chĕng hơ len, tơ lĕch dôm trong jang tơ gŭm, pơ trŭt anih jang mơ dro sa tơ̆ dôm tơ ring mơ mat tat. Chih iŏk dôm nơ̆r tơ gop, apĭnh đơ̆ng dêh char, ƀok Đỗ Ngọc An, Phŏ Kơ dră Anih jang Mŭk drăm Trung ương, akhan, Dak Lak kăl kơ pơ jing khŭl jang mơ dro sa, hơ tŏk tơ iung anih jang mơ dro sa hơ tŏk đei dôm tơ mam ‘lơ̆ng kơ tơ ring.

Thuem: Tơ blơ̆