VOV4.Bahnar - “Dak Lak kăl kơ tang hloh dơ̆ng lơ̆m tang găn glơ̆k kơ đak tơ̆ hơ ioh”, ‘nâu jĭ nơ̆r athei đơ̆ng Khŭl bơ̆ jang kơ Anih jang joh ayŏ - pơ tho pơ hrăm Kuôk hô̆i jăl XV ƀơ̆t bơ̆ jang hăm Anih vei lăng kon pơ lei dêh char Dak Lak găh tơ drong jang kiơ̆ trong jang tơ gŭm khôi luơ̆t tang găn glơ̆k kơ đak tơ̆ hơ ioh lơ̆m dêh char lơ̆m kơ sơ̆ ‘năr 11/8. Kiơ̆ tơ roi tơ băt đơ̆ng Anih vei lăng kon pơ lei dêh char Dak Lak, tơ drong glơ̆k kơ đak tơ̆ hơ ioh lơ̆m dêh char oei đei ƀôh hơ nơ̆ng, kơ sô̆ hơ ioh lôch sơ năm đơ̆ng rŏng lơ hloh sơ năm hơ drol.

Ƀok Tạ Văn Hạ, Phŏ Kơ dră vei lăng Anih jang joh ayŏ - tơ pôl kơ Kuôk hô̆i iung pơ ma tơ̆ jơ bơ̆ jang

Sơ năm 2016 truh dang ei đei hloh 420 ‘nu hơ ioh lôch yua đơ̆ng glơ̆k kơ đak, hơ drô̆ 6 khei blŭng sơ năm 2022, hlôi đei 55 ‘nu lôch, akŏm tơ̆ dôm oh đơ̆ng 6-13 sơ năm. Iung pơ ma tơ̆ jơ bơ̆ jang, ƀok Tạ Văn Hạ, Phŏ Kơ dră Anih jang joh ayŏ - tơ pôl kơ Kuôk hô̆i hlôi tơ gŭm hăm dôm tơ drong mơ mat tat păng ưh kơ ‘lơ̆ng mă dêh char Dak Lak tŏk bŏk tơ ƀơ̆p ƀơm. Hơ dai hăm athei rim kơ dră, rim anih jang lơ̆m dêh char kăl kơ hơ tŏk ‘lơ̆ng hloh dơ̆ng hơ năp jang lơ̆m tơ drong jang tơ roi tơ băt, pơ tho hơ tŏk ‘lơ̆ng đon hlôh vao ăn đĭ đăng kon pơ lei găh tang găn glơ̆k kơ đak tơ̆ hơ ioh.

Thuem: Tơ blơ̆