Hô̆i đŏng kon pơlei dêh char Đăk Lăk jăl 11, jăl jang 2026–2031 'nao pơtơm tơdrong hop akŏm mă mônh. 'Măng hop akŏm pơih blŭng ăn tơdrong jang kơ Hô̆i đŏng kon pơlei dêh char lơ̆m jăl jang 'nao. 'Măng hop akŏm mă ou, rim bơngai tang măt hlôi pơtơm pôk kơchư̆k jang: kơdră, rim phŏ kơdră Hô̆i đŏng kon pơlei dêh char, rim kơdră kơ dôm hơnih jang ăn Hô̆i đŏng kon pơlei dêh char Đăk Lăk jăl 11, jăl jang 2026-2031. Yă Cao Thị Hoà An, pơtoi đei pôk jang Kơdră Hô̆i đŏng kon pơlei dêh char Đăk Lăk jăl 11, jăl jang 2026–2031. Ƀok Đỗ Thái Phong, ƀok Từ Thái Giang păng yă Phúc Bình Niê Kđăm đei pôk jang Phŏ Kơdră Hô̆i đŏng kon pơlei dêh char.

Ƀok Đỗ Hữu Huy, jang hơmŏ lơ̆m Trung ương Đảng, Phŏ ƀĭ thư Tĭnh uy đei pôk jang kơchư̆k Kơdră Hơnih jang vei lăng kon pơlei dêh char Đăk Lăk, jăl jang 2026 -2031; Rim Phŏ Kơdră Hơnih jang vei lăng kon pơlei dêh char đei: ƀok Đào Mỹ, ƀok Nguyễn Thiên Văn, ƀok Trương Công Thái păng yă Hồ Thị Nguyên Thảo. Ƀok Lương Nguyễn Minh Triết, Ƀĭ thư Tĭnh uy Đăk Lăk pơgơ̆r hăm Hô̆i đŏng kon pơlei dêh char tenh kuăng sơđơ̆ng jơnŭm pơgơ̆r, vei sơđơ̆ng tơdrong jang gơh tơnăp, đei jơnei kơjăp.