Jang tŏk GRDP jăl khei mă I/2026 kơ dêh char Đắk Lắk pơhlom dang 7,5%, tŏ sĕt ƀiơ̆ kơsô̆ tơlĕch, jing tơdrong kơhret tih ăn dôm jăl khei đơ̆ng rŏng dơ̆ng kơ sơnăm ‘nâu. Tơ̆ hop akŏm, lơ nơ̆r pơma tơƀôh hơdăh dôm tơdrong oei găn trong găh tơdrong pơgơ̆r jang, hơmet ming trong pơm hla ar, bơ̆ jang ming man păng thu mong jên, athei jăh tơplih ming kiơ̆ trong jang tŏk mă hơdăh, tơlĕch hơnăp jang ăn rim anih, rim tơring. Kơdră chĕp kơ̆l Jơnŭm pơgơ̆r kon pơlei dêh char Đắk Lắk athei hơlen năng mă ‘lơ̆ng tơdrong jang tŏk kiơ̆ khei, pơm hơdăh rim tơdrong jang. Lơ nơ̆r pơma oei akhan, tơdrong hơmet ming trong pơm hla ar oei hiơ̆ hyĭn, tam mă pơm lăp hăm yăn âu, pơm pơmat tat ăn tơring.

Bí thư Đảng dêh char Đắk Lắk Lương Nguyễn Minh Triết athei akŏm jơhngâm sek tơlang mă ‘lơ̆ng dôm tơdrong jang găh sir iŏk tơmam khoáng sản, unh hơyuh, chă tơmang lăng păng hơtŏk hrĕnh tơdrong pơm hla ar. Đon tơchĕng đơ̆ng dêh char Đắk Lắk ‘nŏh: Ưh đei lê̆ đei tơdrong ‘sơđơ̆ng ăn kơdih’ mă pơm pơmat ăn anih tĕch mơdro… dêh char Đắk Lắk chih hơdăh athei tơplih ming đon tơchĕng, kăt tơjur khei ‘năr păng jên pơm hla ar vă pơjing jơhngâm pran ăn tơdrong jang tŏk.