VOV4.Bahnar - ‘Năr 17/5, Khŭl tang măt Kuôk hô̆i dêh char Dak Lak hlôi đei jơ bơ̆ jang hăm Anih vei lăng kon pơ lei dêh char păng rim anih jang vă hơ met ăn dôm tơ drong tơm vang akŏm tơ̆ ‘măng Hop akŏm mă 3, Kuôk hô̆i jăl 15. Lơ nơ̆r apĭnh ƀơm truh trong jang tơ gŭm lơ̆m hơ tŏk tơ iung mŭk drăm tơ pôl kơ tơ ring hlôi đei tơ mơ̆t lơ̆m hla ar chih tơ roi tơ băt pơ truh ăn Kuôk hô̆i.

Dôm bơ ngai tang măt tơ gop nơ̆r apĭnh truh khŭl tang măt Kuôk hô̆i

Tơ̆ jơ bơ̆ jang, tang măt kơ dră chĕp kơ̆l rim anih jang dêh char Dak Lak hlôi tơ roi lơ mơ mat tat păng athei trung ương xet hơ len, hơ met pơ ‘lơ̆ng ăn hơ tŏk tơ iung mŭk drăm tơ pôl tơ̆ tơ ring tơ̆ hơ năp kơnh, nhen hơ tŏk tơ iung ŭnh hơ yuh rơ goh trong vă jang hơ tŏk tơ iung truh sơ năm 2045, Khŭl kơ dră teh đak, Anih tơm vei lăng găh kơ măy kơ mŏk mơ dro sa kăl kơ set hơ len hơ met ming hơ tŏk kơ sư̆k vă hơ tŏk tơ iung ŭnh hơ yuh rơ goh tơ̆ Dak Lak. Dôm bơ ngai tang măt kŭm apĭnh lơ tơ drong ƀơm truh tơ drong jang tơ mam drăm lơ̆m teh, set hơ len trong jang hơ drô̆ ăn pơ lei tơm Buôn Ma Thuột, tơ drong jang chĕng hơ met, iŏk yua teh, tơ drong 1,2 jăl trong gre tơm tŏk bŏk kơ nê̆ mă lei tam mă đei asong jên hơ met. Khŭl tang măt Kuôk hô̆i dêh char Dak Lak sơng iŏk nơ̆r tơ gop đơ̆ng dôm bơ ngai tang măt, akŏm, klăih song vă pơ truh ăn Kuôk hô̆i păng dôm Anih tơm anih jang set hơ len.

Thuem: Tơ blơ̆