VOV4.Bahnar - Lăp oei pă 2,3 năr dơ̆ng, vă jê̆ 480.000 ‘nu hŏk tro dôm jăl tơ̆ Dak Lak gô yak mơ̆t lơ̆m sơ năm hŏk ‘nao 2022 - 2023. Lơ̆m khei ‘năr dêh char Dak Lak tŏk bŏk ưh kơ măh 1.260 ‘nu thây kô pơ tho, anih jang vei lăng pơ tho pơ hrăm tơ̆ dêh char hlôi păng tŏk bŏk kơ chăng pơ jing dôm trong jang vă vei sơ đơ̆ng tơ drong jang pơ tho lơ̆m sơ năm hŏk ‘nâu.   

Sơ năm hŏk 2022 – 2023 âu, Hnam trưng hŏk jăl 1 Cư Pui II, xăh hơ tăih hơ tŏ Cư Pui, apŭng Krông Bông đei 1.400 ‘nu hŏk tro kiơ̆ hŏk dôm lăm đơ̆ng 1 truh 5. Thây pơ tho Nguyễn Hồng Thuần – Kơ dră vei lăng hnam trưng tơ roi, dang ei hnam trưng ưh kơ măh akŏm 8 ‘nu thây kô pơ tho: 

“Hnam trưng đei 37 lăm, jô̆ đei nơ̆r anh hŏk 4 tiêt ‘noh ưh kơ măh tŏ sĕt hloh 2 ‘nu thây kô pơ tho, oei tin học kŭm ưh kơ măh 2 ‘nu thây kô pơ tho. Âu ki, hnam trưng hlôi apĭnh Anih vei lăng pơ tho pơ hrăm apŭng păng hlôi hôp păng đei drơ̆ng nơ̆r trong jang apĭnh Anih Nội vụ, Anih vei lăng kon pơ lei apŭng 1 môn 1 biên chế ‘noh nơ̆r anh păng tin học, oei ưh kơ măh 2 ‘nu dơ̆ng ‘noh hnam trưng gô kĭ hla ar pơ tho kiơ̆ khei ‘năr pơ kăp păng mưh lai yơ đei biên chế ‘noh iŏk đơ̆ng pơm hla ar hơ dai.”

 Apŭng Krông Bông dang ei đei 51 hnam trưng hŏk đơ̆ng mầm non truh jăl 2, hăm 21 rơ bâu hŏk tro kiơ̆ hŏk. Ƀok Huỳnh Viết Trung – Kơ dră pơ gia vei lăng Anih jang găh pơ tho pơ hrăm apŭng tơ băt, anih jang pơ tho pơ hrăm apŭng ưh kơ măh 133 ‘nu thây kô pơ tho, lơ̆m noh găh lơ ‘noh jĭ kô pơ tho Mầm non hăm 80 ‘nu, uơ oei dơ̆ng ‘noh 53 thây kô pơ tho jăl 1. Mă đơ̆ng tŏk bŏk ưh kơ măh lơ thây kô pơ tho, mă lei anih jang hlôi păng tŏk bŏk kơ chăng pơ jing dôm trong jang vă vei sơ đơ̆ng tơ drong jang pơ tho pơ hrăm ăn sơ năm hŏk ‘nao. Ƀok Huỳnh Viết Trung tơ roi trong jang:

Dêh char Dak Lak dang ei ưh kơ măh hloh 670 ‘nu kô pơ tho Mầm non

“Hăm jăl mầm non, nhôn gô tơ jur kơ sô̆ tơ̆ lăm dơ̆ng vă hơ vơn đei kơ sô̆ hŏk tro lăm lơ ƀiơ̆, hăm kơ sô̆ jô̆ păh lăp 1,5 kô pơ tho tơ̆ lăm, mă ưh kơ hơ met ăn kiơ̆ hơ găt ‘noh 2 kô pơ tho tơ̆ lăm. Oei hăm jăl 1, nhôn oei vei sơ đơ̆ng đĭ đăng dôm hnam trưng oei gô pơ tho tin học, nơ̆r teh đak đe kiơ̆ tơ drong pơ tho ‘nao. Vă jang kiơ̆ đei tơ drong ‘nâu, anih jang gô pơ gơ̆r tơ pôl vang jang; mă 2 gô akŏm dơ̆ng biên chế vă iŏk yua hơ nih rơ kăh; păng trong jang hơ tuch ‘noh jĭ dôm hnam trưng iĕ ‘noh thây kô pơ tho tin học, nơ̆r teh đak đe athei jang kiơ̆ tơ drong pơ tho hŏk lơ hnam trưng vă vei sơ đơ̆ng ăn sơ năm hŏk ‘nao.”

Oei tơ̆ apŭng Krông Búk, sơ năm hŏk 2022 – 2023 âu kŭm sơng dang 14.000 ‘nu hŏk tro, kiơ̆ hŏk dôm jăl đơ̆ng Mầm non truh jăl 2 tơ̆ 46 hnam trưng hŏk. Lei lăi nhen apŭng Krông Bông, anih jang pơ tho pơ hrăm apŭng Krông Búk kŭm tŏk bŏk ưh kơ măh 110 ‘nu thây kô pơ tho. Mă lei ưh kơ lei lăi nhen Krông Bông, kơ sô̆ thây kô pơ tho ưh kơ măh tơ̆ Krông Búk đei ƀôh hơ tŏ pơ đĭ tơ̆ 3 jăl hŏk đơ̆ng Mầm non truh jăl 2. Lơ̆m noh Mầm non ưh kơ măh lơ hloh hăm 58 ‘nu kô pơ tho, jăl 1 ‘noh 38 ‘nu, uơ oei dơ̆ng 18 ‘nu thây kô pơ tho jăl 2. Ƀok Nguyễn Đình Khả – Kơ dră vei lăng Anih jang găh pơ tho pơ hrăm apŭng tơ roi găh trong tơ lĕch jang pơ tho pơ hrăm đơ̆ng anih jang găh pơ tho pơ hrăm Krông Búk sơ năm hŏk ‘nao 2022 – 2023, lơ̆m khei ‘năr tơ ring tŏk bŏk ưh kơ măh thây kô pơ tho kơ tang:

“Anih jang găh pơ tho pơ hrăm vang tơ gŭm ăn Anih vei lăng kon pơ lei apŭng ‘noh jĭ tơ drong chă bơ ngai jang tam mă hơ met tôm kiơ̆ kơ sô̆ đơ̆ng thây kô pơ tho. Pơ tih gia hăm jăl Mầm non hơ găt ‘noh 2,2, păng ‘meh ăn vă tơ pă ‘noh 2,0 ‘nu kô dơ̆ng tơ̆ lăm, ‘noh nhôn ăn jur 1,5 truh 1,6 kô dơ̆ng tơ̆ lăm đĕch vă pơm lăp hăm pơ tho hŏk tro lĕch lăm. Jăl 1 ‘noh 1,5, nhôn hơ met ăn jur dang 1,3 dăh mă 1,2 đĕch. Jăl 2 ‘noh ưh kơ măh 18 ‘nu, môn ưh kơ măh môn rơ kăh, tơ drong ‘nâu proh hơ met dơ̆ng păng hơ met ăn pơ tho gơh”.

Lơ̆m dêh char Dak Lak ưh kơ măh 1.260 ‘nu thây kô pơ tho đơ̆ng Mầm non truh jăl 3

Sơ năm hŏk ‘nao âu dêh char Dak Lak đei 478.180 ‘nu hŏk tro kiơ̆ hŏk tơ̆ 1.071 hnam trưng hŏk đơ̆ng Mầm non truh jăl 3 păng pơ tho pơ hrăm hơ nơ̆ng, pơ tho pơ hrăm tơ drong jang. Dang ei Dak Lak tŏk bŏk ưh kơ măh 1.260 ‘nu thây kô pơ tho. Ƀok Phạm Đăng Khoa – Kơ dră chĕp kơ̆l Anih vei lăng pơ tho pơ hrăm Dak Lak tơ băt:

“Hăm Dak Lak ‘noh tŏk bŏk gô pơ jao tơ drong hơ găt tơ mơ̆t dơ̆ng đơ̆ng Khŭl kơ dră teh đak ăn. Anih vei lăng pơ tho pơ hrăm hlôi jang tơ gŭm ăn Anih vei lăng kon pơ lei dêh char klăih song kơ sô̆ hơ găt đei pơ jao tơ mơ̆t dơ̆ng ‘noh ăn kơ rim tơ ring oei tŏk bŏk ưh kơ măh lơ pơ tih gia nhen: Lắk, Krông Bông, Krông Búk, ‘nâu jĭ dôm apŭng dơ nuh hin. Tơ drong tơ mơ̆t dơ̆ng gô hơ găt pơ ‘nhŏ ăn jăl mầm non. Dôm tơ ring đei mŭk drăm păi ƀiơ̆ ‘noh akŏm krao hơ vơn trong jang tơ pôl vang tơ gop....”.

Hăm tơ drong kơ chăng, hơ met ăn, proh hơ met dơ̆ng khŭl thây kô pơ tho tơ̆ dôm hnam trưng hŏk, anih pơ tho pơ hrăm kŭm nhen dôm trong jang nai lơ̆m tơ drong ưh kơ măh hloh 1.200 tơ drong hơ găt biên chế thây kô pơ tho, anih jang găh pơ tho pơ hrăm Dak lak hlôi hơ met tôm sơng hŏk tro truh tơ̆ hnam trưng lơ̆m sơ năm hŏk ‘nao.

Tuấn Long: Chih

Thuem: Tơ blơ̆