VOV4.Bahnar - Mĭnh sơ năm hŏk gĭt kăl hăm găh lơ khei ‘năr hŏk trực tuyến, pơm ăn lơ hŏk tro lăm 12 tơ̆ Dak Lak bơ ngơ̆t ăn ‘măng ôn pơ long tốt nghiệp jăl 3 sơ năm 2022. Vă kơ đe oh sơ đơ̆ng chơ̆n jơ hngơ̆m lơ̆m hŏk pơ hrăm, lơ hnam trưng jăl 3 hlôi đei hrôih trong ôn pơ long tốt nghiệp ăn kơ đe oh. Tơ̆ hnam trưng hŏk jăl 3 Lê Qúy Đôn, pơ lei tơm Buôn Ma Thuột, dêh char Dak Lak, hloh 530 ‘nu hŏk tro lăm 12 hŏk trực tuyến ngăl lơ̆m prăt sơ năm hŏk âu. Vă tơ gŭm hŏk tro lăm 12, hnam trưng hlôi pơ gơ̆r hơ len lăng klăih song tơ drong hŏk gơh đơ̆ng rim oh, klăih song lăm păng đei trong tơ lĕch jang pơ tho ming ƀai hŏk mă hơ dăh.

‘Măng pơ long tốt nghiệp jăl 3 sơ năm 2022 tơ chĕng hơ drol gô pơ gơ̆r đơ̆ng ‘năr 7 truh ‘năr 11/7/2022. Lơ̆m tơ drong jĭ hơ buh đei ƀôh krê hơ mơt tơ̆ rim tơ ring, ‘măng pơ long tốt nghiệp gô đei kơ dŭn dơ̆ng pơ gơ̆r jing lơ ‘măng pha ra băl lei lăi nhen ‘măng pơ long tốt nghiệp sơ năm 2021. Truh khei ‘năr âu, lơ hnam trưng hŏk jăl 3 tơ̆ Dak lak hlôi kơ chăng dôm trong jang pơ hrăm ming ăn kơ hŏk tro vă kơ đe oh yak mơ̆t lơ̆m ‘măng pơ long hăm điêm lơ hloh.

Thuem: Tơ blơ̆