VOV4.Bahnar - Tơ̆ Hnam trưng Đại học Tây Nguyên (pơ lei tơm Buôn Ma Thuột, dêh char Dak Lak) hlôi pơ gơ̆r plang song pham tơ gŭm Năr pơh ƀrê ‘măng mă 14 sơ năm 2022. Mă đơ̆ng tŏk bŏk jĭ hơ buh đei ƀôh krê hơ mơt, kơ hrĕng ‘nu sinh viên kơ Hnam trưng ưh kơ ‘nhoen vang năm plang song plam. Hăm nơ̆r pơ ma “ plang song pham dŏng bơ ngai - Tơ drong arih buăl păng ĭnh”, tơ drong jang plang song pham tơ gŭm Năr pơh ƀrê ‘măng mă 14 sơ năm ‘nâu tơ̆ Hnam trưng Đại học Tây Nguyên sơng đei tôch kơ lơ sinh viên vang akŏm.

Tơ̆ tơ drong jang, khŭl pơ gơ̆r hlôi sơng iŏk 606 đơn vị pham. Hnam trưng Đại học Tây Nguyên kŭm jing hơ nih hơ tuch, pơ tôch tơ drong jang Năr pơh ƀrê tơ̆ Dak Lak sơ năm ‘nâu. Lơ̆m vă jê̆ 1 khei 1 puăt âu ki, tơ drong jang Năr pơh ƀrê tơ̆ Dak Lak hlôi sơng iŏk đei vă jê̆ 3.500 đơn vị pham, pơ truh ăn rim hnam pơ gang păng anih jang pơ gang lơ̆m dêh char vă pơm lăp ‘meh vă pham ăn kâp kư̆u păng hơ met bơ ngai jĭ.

Thuem: Tơ blơ̆