Sơnăm hŏk 'nao 2026 – 2027, Hnam trưng teh đak rong jăl mônh păng jăl ƀar Ia R'vê đei 34 lăm hŏk, hăm 880 'nu hŏk tro, lơ̆m noh 216 'nu hŏk tro hŏk oei sa kơtă tơ̆ hnam trưng. Ƀok Hồ Sĩ Cát, Hiê̆u trơng Hnam trưng ăn tơbăt, kŭm hăm hơmet rim tơdrong pơyua ăn tơdrong pơtho păng hŏk pơhrăm, hnam trưng oei năng kăl truh tơdrong tang găn jĭ jăn ăn hŏk tro. "Nhôn jang hơdoi hăm Hnam pơgang xăh Ia R'vê, Hnam pơgang Khul jang mŭk drăm – Vei lăng teh đak 737 pơgơ̆r pruih pơgang, pơlôch klanh, hơngĕnh jŭm dăr anih oei, hnam sŏng xa, tep pơdơ̆h. Pơtho ăn hŏk tro vei rơgŏh anih oei. Atŭm hăm 'nŏh, athei anih jang pơgang tơ̆ hnam trưng hơmet tôm pơgang vă tang găn mưh đei hŏk tro jĭ jăn."

Oh Đậu Anh Thư, 10 sơnăm, tơ̆ xăh Ia R'vê 'măng mă blŭng hơtăih kơ unh hnam, hŏk pơhrăm păng oei xa tơ̆ hnam trưng. Đơ̆ng rŏng minh giĕng pơm juăt hăm anih 'nao, Anh Thư đĭ vă juăt hăm tơdrong oei xa hơdrô̆ bơih: "Adrol kơ sŏng sa 'noh oh athei ôp ti, pơm kiơ̆ trong sŏng sa tơmam sĭn, nhă đak tŏ. Mưh pơngôi 'noh lê̆ pơngôi tơ̆ dôm anih hơ ‘yuih, đei lơ hơngĕnh, kơnh sư kăp oh, kơna athei tang găn. Nhôn kŭm klăih song năr trư̆k vei lăng anih. Mưh tep 'noh chô̆ kơmŭng vă tang găn hơngĕnh kăp."

Jâ̆p lơ̆m dêh char Đăk Lăk dang ei đei 650.000 ‘nu hŏk tro kiơ̆ hŏk tơ̆ 625 anih pơtho pơhrăm. Ƀok Lưu Tiến Quang, Phŏ Kơdră Anih vei lăng pơtho pơhrăm dêh char Đăk Lăk, ăn tơbăt, tơdrong tang găn jĭ jăn kơtă tơ̆ hnam trưng đei Anih jang năng jĭ tơdrong jang tôch gĭt kăl: "Anih pơtho pơhrăm, pơtho ăn dôm hnam trưng, lăm hŏk, mă loi ‘nŏh tơ̆ tơring hơtăih yăih, adrin pơgơ̆r chong ‘ngiĕt, hơmet pơ 'lơ̆ng anih arih xa, hŏk pơhrăm vă tang găn jĭ pơlŏ lĕch đe. 'Ngoăih kơ 'nŏh, hăm dôm tơdrong jĭ nai kiơ̆ pơyan, athei khul jang pơgang tơ̆ hnam hŏk hơlen năng mă brĕ vă găn tôch ai tơdrong hơmơt đei jĭ tơpoh lanh lơ̆m hnam trưng."

Ƀak si Hoàng Hải Phúc, Kơdră Anih vei lăng tơdrong jĭ jăn dêh char Đắk Lắk, ăn tơbăt sơnăm hŏk 'nao kŭm jing khei 'năr đei 'mi lơ, pơm ăn dôm tơdrong jĭ tơpoh nhen jĭ pơlŏ lĕch đe, jĭ jơ̆ng ti ƀơ̆r, jĭ chŭ… roi tŏk. Anih jang pơgang jang hơdai hăm anih pơtho pơhrăm oei tơlĕch lơ trong jang, kơchăng tang găn jĭ: "Rim tơring tơlĕch lơ tơdrong jang pơm rơgoh cham char, vei lăng rơgoh hnam oei vă tang găn dôm tơdrong jĭ pơlŏ lĕch đe, jĭ jơ̆ng ti ƀơ̆r, jĭ chŭ; atŭm hăm ‘nŏh hơtŏk tơdrong ƀet bơ̆ng, ƀet klăm dơ̆ng ăn đe hơioh tam mă ƀet bơ̆ng tôm. Tơ̆ dôm hnam trưng păng rim tơring hơmơt đei jĭ tơpoh, nhôn ăn kăn ƀô̆ jur dăr lăng, hơlen năng kơsô̆ véc-tơ, kơsô̆ klanh păng tơdăh ƀôh hơmơt 'noh ăn gre ôtô chơ kơmăi pruih pơgang pơlôch hơngĕnh, klanh tơ̆ jơ̆p tơring."./.