VOV4.Bahnar - Ƀlep năr tơbăt 67 sơnăm Năr Ƀok thây pơgang Việt Nam (27/2), năr 25/2, Khŭl bơ̆ jang Dơnŏ anĭh Đảng, Dơnŏ anĭh vei lăng kon pơlei dêh char Dak Lăk hlôi năm ngôi, hmach chơt hơ iă ăn Kơdră chĕp pơgơ̆r, khŭl ƀok thây pơgang kơ Dơnŏ anĭh vei lăng jang pơgang dêh char, Hơnĭh tơm dăr lăng Jĭ jăn dêh char păng Hnam pơgang tơm Tơring Tây Nguyên.

Kơdră chĕp pơgơ̆r dêh char Dak Lăk pôk ăn pơkao hmach chơt hơ iă ăn Dơnŏ anih vei lăng jang pơgang dêh char ƀlep lơ̆m Năr Ƀok thây pơgang Việt Nam 27-2

Tơ̆ Dơnŏ anih vei lăng jang pơgang dêh char, ƀok Nguyễn Đình Trung, Kơdră jang lơ̆m Trung ương Đảng, Bí thư Đảng dêh char hlôi mơ̆ng Kơdră chĕp pơgơ̆r Dơnŏ anĭh vei lăng jang pơgang tơbăt mĭnh ƀar tơdrong jang lơ̆m khei năr au ki. Tơ̆ hơnăp jĭ hơbuh Covid-19 pơrăm kơtang păng đunh đai, Dơnŏ anĭh vei lăng jang pơgang dêh char păng chă hơvơn rim khŭl vă iung jang tang găn jĭ hơbuh Covid-19. Hrei au, đĭ đăng rim Hnam pơgang, Hnam pơgang apŭng jei pơjing Hơnĭh ming hơmet jĭ Covid-19 vă chă ming hơmet ăn bơngai jĭ Covid-19 kiơ̆ trong jang hnam pơgang tơring “mĭnh păh ming hơmet jĭ jăn hmă adoi ming hơmet hloi bơngai jĭ Covid-19”. Iung pơma tơ̆ jơ bơ̆ jang, Bí thư Đảng dêh char Nguyễn Đình Trung pơtrŭh nơ̆r hmach chơt hơ iă ăn đĭ đăng kang ƀô̆, bơngai jang kơ hơnĭh jang pơgang; hôn bơnê dôm tơdrong iŏk đei jơnei lơ̆m sơnăm au ki hlôi tơgop gĭt kăl vă jang keh đang trong tơlĕch jang atok tơ iung mŭk drăm-tơpôl, mă kăl tang găn jĭ Covid-19 lơ̆m dêh char.

Tơblơ̆ nơ̆r: Amazưt