Đăk Lăk dang ei đei pơhlom 44.000 ha sâu riêng, lơ̆m noh đei hloh 33.000 ha tŏk bŏk oei đei iŏk yua, pơyan jang sơnăm 2026 đei pơhlom 500.000 tơ̆n. 'Nou jĭ minh lơ̆m dôm tơdrong choh jang xa đei kơjă tĕch ăn teh đak đe tih hloh kơ tơring, tơgop kăp gĭt ăn tơdrong hơtŏk mŭk drăm păng pơyua ăn kon pơlei.

Mă lei, hăm tơdrong pơkăp roi năr roi kơhret đơ̆ng dôm teh đak răt tơmơ̆t gah tơdrong hơlen hơdah tơm a la chă, hơlen hơdah tơdrong rơgoh tơmam drăm xa, tơdrong vei lăng kơsô̆ pơkăp tơring pơtăm, kơsô̆ pơkăp hơnih 'nŭng 'măn tơ̆ minh ƀar tơring adoi oei tơnap tap, ƀơm răm truh đon lui păng pơm jang tĕch răt hăm teh đak đe.

Hơnih jang Tĭnh uy Đăk Lăk pơtruh nơ̆r hăm Đảng uy Hơnih jang vei lăng kon pơlei dêh char ou, dah pơgơ̆r hăm rim hơnih jang păng rim tơring tenh kuăng chă hơlen lăng tôm kơsô̆ pơkăp tơring pơtăm, kơsô̆ pơkăp hơnih 'nŭng 'măn hlôi đei asong; hơtŏk tenh tơdrong asong 'nao hăm dôm tơring hlôi tôm pơkăp; khŏm mă sek tơlang dôm tơdrong tĕch răt, ăn thuê, iŏk mơng kơsô̆ pơkăp tơring pơtăm, kơsô̆ pơkăp hơnih 'nŭng 'măn păng dôm tơdrong jang pơgơ̆m pơjĭp lơ̆m hla bar chih tĕch tơmam drăm ăn teh đak đe.

Dêh char Đăk Lăk adoi pơjing trong jang hơdoi hăm hơnih jang đei tơrĕk kơ dôm hơnih choh jang xa, tĕch pơdro, kŏng ang, haih kuan, thuê̆ păng jơnŭm pơgơ̆r tơring vă drơ̆ng minh gah hla bar chih pơkăp, hơlen kơjăp tơdrong pơm tơlĕch – tĕch răt – tĕch ăn teh đak đe; atŭm hăm 'noh drơ̆ng nơ̆r hơtŏk kơtang tơplih kơmăi kơsô̆, chih akŏm yư lĭu kăl 'măn yua atŭm ăn tơdrong jang vei lăng, tơroi tơbăt păng pơgơ̆r jang.

Kiơ̆ đơ̆ng ƀok Lương Nguyễn Minh Triết, Kơdră jang lơ̆m Trung ương Đảng, Bí thư Đảng dêh char Đăk Lăk, lơ tơdrong tơhlăk tơhlĭn kơ hơnih jang sâu riêng đei ƀơm truh trong bơ̆ jang đơ̆ng Trung ương, mă kăl ‘noh tơdrong ƀơk ăn mã kơsô̆ tơring pơtăm, mã kơsô̆ hơnih tăh ‘nŭng, tơchă băt tơm a la chă păng hơnih jang hơlen hơdăh tơdrong ‘lơ̆ng. Dêh char Đăk Lăk hlôi akŏm dôm nơ̆r tơgop vă pơtruh athei Trung ương hrôih hơmet pơ ‘lơ̆ng, veh ver đei ƀơm ưh kơ ‘lơ̆ng truh tơdrong răt yoa păng tĕch mơdro tơ̆ teh đak đe lơ̆m pơyan phĕ tĕch sơnăm ou: “Apĭnh athei pơm pơkeh dôm tơdrong tơchơ̆t đei ƀơ,m truh hơlen băt tơm a la chă, ƀơk ăn mã kơsô̆ tơring pơtăm, mã kơsô̆ hơnih tăh ‘nŭng păng pơtrŭt tơpôl vang iung jang hơlen hơdăh tơdrong ‘lơ̆ng. Hrei ou, Khul jang sầu riêng păng Hơnih tĕch mơdro sâu riêng jĭ hơnih kăl kơ dêh char tŏk bŏk tơtok kơtang găh tơdrong ou. Kơna nou jei gômơ̆ng kiơ̆ lơ̆m trong bơ̆ jang đơ̆ng Trung ương, găh dêh char jei băt mơ̆n tơdrong ‘nou mă lei jei ưh kơ gơh tơlĕch jang kiơ̆ tơdrong ou ôh”.

Hăm trong pơrô̆ jang kơtang đơ̆ng Hơnih Đảng dêh char atŭm hăm vang iung jang kơtang đơ̆ng rim tơring, rim hơnih bơ̆ jang, Đăk Lăk hơmŏ gô hơmet pơ ‘lơ̆ng tơtom dom tơdrong tơhlăk tơhlĭn, iung jang kơtang vei lăng đĭ đăng trong choh jang sa păng tĕch mơdro sâu riêng tơ̆ teh đak đe. Kiơ̆ đơ̆ng noh, ưh khan lăp vei lăng hơnăn sâu riêng Đăk Lăk lơ̆m hơnih tĕch răt tơ̆ teh đak đe, mă oei tơgop vei kơjăp tŏk kơjăp ăn dôm tơmam drăm kăl, vei lăng năng tông ‘lơ̆ng hơ iă jang sa iŏk đei ăn kon pơlei pơtăm.