VOV4.Bahnar - Kiơ̆ kơ Anih pơ gơ̆r jang krao hơ vơn plang song pham tơ gŭm dêh char Dak Lak, khei ‘năr hơ drol, lơ̆m păng đơ̆ng rŏng têt Nguyên đán Nhâm Dần 2022, Hnam pơ gang Đa khoa tơ ring Tây Nguyên kŭm hăm rim anih jang pơ gang kơ dêh char gô kăl dang 2.000 tơ pu pham vă kâp kư̆u păng hơ met ăn dôm bơ ngai jĭ.

Dôm bơ ngai jang tơ gŭm vang plang song pham

Hăm hơ năn: “ Plang kơ toh pham ƀrê - pơ jao tơ drong arih”, Tơ drong jang “ Năr pơh ƀrê” ‘măng mă 9 sơ năm 2022, yua đơ̆ng Anih pơ gơ̆r jang krao hơ vơn plang song pham tơ gŭm dêh char Dak Lak pơ gơ̆r đơ̆ng ‘năr 8/1 truh dang ei hlôi sơng đei hloh 3.500 ‘nu bơ ngai vang plang song. Vă jê̆ 3.000 tơ pu pham hlôi đei khŭl pơ gơ̆r jang gơ̆ih truh Anih jang găh pham Trung ương păng rim anih jang pơ gang lơ̆m dêh char vă pơ yua ăn dŏng hơ met bơ ngai jĭ. Tơ̆ dôm năr plang song pham tơ gŭm rim bơ ngai adoi pơm kiơ̆ ‘lơ̆ng dôm trong jang tang găn jĭ Covid-19.

Thuem: Tơ blơ̆