VOV4.Bahnar - Dak Lak jĭ dêh char đei lơ tơ drong ‘lơ̆ng hơ tŏk tơ iung choh jang sa. Lơ̆m tơ chơ̆t Hop akŏm Đảng bộ dêh char ‘măng mă 17, jăl jang 2021-2025 hlôi băt hơ dăh hơ tŏk tơ iung choh jang sa kiơ̆ trong ‘lơ̆ng, kơ jăp ‘noh jĭ 1 lơ̆m 6 tơ drong jang tơm vă hơ tŏk tơ iung mŭk drăm kơ dêh char. Lơ̆m dôm sơ năm âu ki, Dak Lak hlôi đei lơ trong jang tơ gŭm sơng iŏk tơ mơ̆t jên jang lơ̆m choh jang sa. Mă loi ‘noh jĭ choh jang sa kơ măy kơ mŏk ‘nao. Mă lei, vă pơ jing tơ drong choh jang sa kiơ̆ jăl hle, kơ jăp tơ ring tŏk bŏk hơ nơ̆ng tŭn pran sơng iŏk tơ mơ̆t jên jang lơ̆m tơ drong jang ‘nâu.

            Hăm ‘meh vă pơm đei tơ mam choh jang sa rơ goh ‘lơ̆ng hăm cham char, vei lăng jơ hngơ̆m pran bơ ngai răt yua. Kŏng ti Cổ phần Ban Mê Green Farm, phường Tân Thành, pơ lei tơm Buôn Ma Thuột hlôi tơ mơ̆t yua kơ măy kơ mŏk ‘nao lơ̆m pơm tơ lĕch pro kreng plei ‘long Nova. Đơ̆ng rŏng hloh 5 sơ năm tơ chĕng hơ len, pơ long lăng kŏng ti hlôi jang đang trong jang ki thuơ̆t, trong jang vei lăng păng tuh mơ̆r ăn kơ ‘long, truh dang ei, pro kreng plei ‘long Nova bluh jing ‘lơ̆ng lăp hăm teh păng tŏ ‘mi kial tơ ring Tây Nguyên, ăn plei ‘yăl păng ‘lơ̆ng. Vă iŏk đei jơ nei âu, kŭm hăm tơ drong hơ drin đơ̆ng kơ dih kŏng ti oei đei tơ drong tơ gŭm tôch kơ lơ đơ̆ng dôm anih tơ mơ̆t jên jang lơ̆m tơ drong jang choh jang sa kơ măy kơ mŏk ‘nao. Yă Nguyễn Thái Thanh, Kơ dră vei lăng Kŏng ti Cổ phần Ban Mê Green Farm tơ băt:  

        “Lơ̆m khei ‘năr âu ki kŏng ti nhôn đei dôm anih tơ mơ̆t jên jang tih tơ mơ̆t jên jang vă hơ tŏk tơ iung dơ̆ng găh khoa hŏk kơ măy kơ mŏk tơ mơ̆t yua tơ plih kơ sô̆ lơ̆m choh jang sa nhen đe sư ăn pơm bơ̆n hla chih tơ băt điên tư vă jang pơ keh păng đơ̆ng rŏng âu gô akŏm lơ̆m kơ măy blocchange vă gơh pơih lăng lơ̆m jơ̆p apŭng plĕnh teh vă tơ moi bơ̆n băt tơ mam bơ̆n thoi yơ păng ‘lơ̆ng lơ liơ.”

       Jĭ 1 lơ̆m dôm anih jang mơ dro sa joăt găh pơm tơ lĕch, tĕch tơ̆ teh đak đe tơ mam đơ̆ng choh jang sa rơ goh, ƀok Phạm Hữu Thời, Kơ dră dơnơm kŏng ti choh jang sa Nhất Thống akhan: Dak Lak jĭ dêh char đei tơ drong pran găh hơ tŏk tơ iung choh jang sa hăm dôm tơ mam choh jang sa tơ mam đei kơ jă tĕch ăn teh đak đe măk nhen: cheh phe (200.000 ha), kơ su (40.000 ha), tiu (21.000 ha). Dak Lak đei lơ tơ drong ‘lơ̆ng găh tŏ ‘mi kial, teh păng dôm tơ drong hiôk đei kơ dih vă pơm lăp dôm tơ drong ‘meh vă pơm tơ lĕch choh jang sa kiơ̆ trong rơ goh hơ dai hăm tơ mơ̆t yua kơ măy kơ mŏk ‘nao lơ̆m pơm tơ lĕch. Ƀôh kơ năl ‘noh jĭ sơ năm 2020 grŭp tơ mam ‘nhot, ƀum, plei ‘long, tiu, kơ su, cheh phe kơ pơ gar choh jang sa rơ goh Cư Bao, thị xã Buôn Hồ, dêh char Dak Lak hlôi đei drơ̆ng rơ goh USDA kơ Châu Âu păng drơ̆ng rơ goh JAS kơ Nhật Bản. Mă lei kiơ̆ ƀok Phạm Hữu Thời pơm tơ lĕch choh ạng sa kơ măy kơ mŏk ‘nao tơ̆ Dak Lak jang oei iĕ, ưh kơ đei dôm anih tơ mơ̆t jên jang lơ vă tơ tơ gŭm hơ nhăk dôm tơ drong jơ nei khoa hŏk kơ măy kơ mŏk ‘nao tơ mơ̆t yua lơ̆m pơm tơ lĕch choh jang sa. Yua thoi noh vă iŏk đei tơ drong hơ găt hơ tŏk tơ iung choh jang sa tơ mơ̆t yua kơ măy kơ mŏk ‘nao păng hơ tŏk ‘lơ̆ng kơ jă tơ mam đơ̆ng choh jang sa đei, dêh char kăl kơ bơ ngơ̆t truh sơng đei tơ mơ̆t jên jang pơm tơ drong hiôk hloh dơ̆ng ăn anih jang mơ dro sa:

        “ Vă iŏk đei tơ drong pơ kăp rơ goh ‘lơ̆ng đơ̆ng jang blŭng truh tơ mam hơ tuch vang lĕch truh tơ pang ti bơ ngai răt yua ‘noh tơ drong pơ gŏ anih jang mơ dro sa athei bơ̆ jang kiơ̆ hrơ̆ch 1 ‘măng tơ mam ‘noh. Mă lei vă iŏk đei tơ drong ‘noh păng đei yua lơ̆m pơm tơ lĕch ‘noh kăl đei tơ drong tơ gŭm bơ ngơ̆t truh tôch kơ lơ đơ̆ng tơ ring vă tơ gŭm jơ hngơ̆m ăn anih jang mơ dro sa đei tơ drong hiôk lơ̆m kơ plăh pơm tơ lĕch.”

Tang măt Kŏng ti Cổ phần Ban Mê Green Farm roi tơ ƀôh trong pơm tơ lĕch pro kreng plei ‘long Nova hăm Bí thư Anih jang Đảng dêh char Dak Lak

        Kiơ̆ kơ  ƀok Nguyễn Đình Trung, Bơ ngai jang lơ̆m Trung ương Đảng, Bí thư anih jang Đảng dêh char Dak Lak, lơ̆m trong vă jang hơ tŏk tơ iung tơ drong jang choh jang sa kơ dêh char, hơ dai hăm bơ̆ jang kiơ̆ hơ met ming tơ drong jang choh jang sa kiơ̆ trong hơ tŏk tơ drong ‘lơ̆ng kơ rim tơ ring, tơ klep hăm ‘meh vă tĕch mơ dro sa, lăp hăm tŏ ‘mi kial tơ plih, mơ̆t jang hơ dai hăm apŭng plĕnh teh. Khŭl chĕp kơ̆p pơ gơ̆r Anih jang Đảng dêh char athei anih vei lăng choh jang sa hơ nơ̆ng tơ plih ‘nao păng hơ tŏk ‘lơ̆ng đei yua dôm trong jang pơ gơ̆r pơm tơ lĕch, lăng kăl hơ tŏk tơ iung jang hơ dai pơm tơ lĕch kiơ̆ tơ drong kơ jă, pơm tơ lĕch đei hla ar pơ kăp, tơ mơ̆t yua kơ măy kơ mŏk ‘nao, choh jang sa rơ goh, choh jang sa tuh mơ̆r lơ̆m pơm tơ lĕch... Dêh char gô pơm rim tơ drong hiôk pơ trŭt sơng iŏk anih jang mơ dro sa tơ mơ̆t jên jang lơ̆m pơm tơ lĕch choh jang sa. Ƀok Nguyễn Đình Trung pơ ma hơ dăh:

        “Dêh char tŏk bŏk pơ gơ̆r tơ drong chĕng hơ met ming iŏk yua teh kŭm nhen tơ chĕng hơ met teh dôm tơ ring pơm tơ lĕch choh jang sa vei sơ đơ̆ng ‘lơ̆ng, tơ jê̆ hăm yan âu mưh anih tơ mơ̆t jên jang truh hăm dêh char ‘noh đei 1 anih jang vă anih tơ mơ̆t jên jang tơ chĕng hơ len păng tơ chơ̆t tơ mơ̆t jên jang. Mă 2 ‘noh tơ klep hơ dai đơ̆ng rim hnam. ‘Nâu jĭ kŭm jing hơ năp jang đơ̆ng dêh char, dêh char dơ̆ng iŏk bơ̆ jang hơ dai. Mă 3, tơ drong pơm anih jang kăl trong nơ năm, dơ nâu đak păng dôm tơ drong jang nai pơ yua ăn rim tơ drong jang choh jang sa kơ măy kơ mŏk ‘nao.”

Bí thư Anih jang Đảng dêh char Dak Lak Nguyễn Đình Trung răp mơ̆ng nơ̆r tơ gop apĭnh đơ̆ng anih jang mơ dro sa tơ mơ̆t jên jang lơ̆m tơ drong jang choh jang choh jang sa kơ măy kơ mŏk ‘nao

Vă pơm hơ yak ‘lơ̆ng lơ̆m hơ tŏk tơ iung choh jang sa kơ măy kơ mŏk ‘nao, jăl jang 2016-2020, dêh char Dak Lak tŏk bŏk akŏm krao hơ vơn sơng iŏk tơ mơ̆t jên jang lơ̆m dôm tơ drong jang tơm ‘noh đei: Hơ nih choh jang sa tơ mơ̆t yua kơ măy kơ mŏk ‘nao xăh Ea Kpam (apŭng Cư M'gar); Hơ nih choh jang sa tơ mơ̆t yua kơ măy kơ mŏk ‘nao xăh Ea Tu (pơ lei tơm Buôn Ma Thuột); Hơ nih choh jang sa tơ mơ̆t yua kơ măy kơ mŏk ‘nao xăh Hòa Xuân (pơ lei tơm Buôn Ma Thuột); Man hnam pơm tơ lĕch ‘lơ̆ng tơ mam đơ̆ng choh jang sa đei tơ̆ Hơ nih jang kơ măy kơ mŏk Hòa Phú, Tân An (pơ lei tơm Buôn Ma Thuột); Hơ nih jang kơ măy kơ mŏk Phú Xuân (apŭng Cư M’gar); Hơ nih choh jang sa tơ mơ̆t yua kơ măy kơ mŏk ‘nao Krông Búk (apŭng Krông Búk).

Hương Lý: Chih

Thuem: Tơ blơ̆