Vă atŏk kơtang iok tơvih teh 53 tơdrong vă jang tơm, dêh char Đắk Lắk hlôi pơjing 5 Khul bơ̆ jang kơ Hơnih Đảng dêh char, kơ yuơ Ƀĭ thư hăm rim Kơ iĕng Ƀĭ thư pơm Kơdră Khul. ‘Nou jĭ dôm tơdrong vă jang oei đei lơ hô sơ jang tim keh đang, tơhlăk tơhlĭn găh groi teh, hrŭ ăn, pơjing hơnih oei ‘nao lơ̆m khei ‘năr đunh đai.

Đơ̆ng rŏng 45 măng năr tơlĕch iung jang iŏk tơvih teh, 7 tơdrong vă jang hlôi keh đang 100% hơgăt teh; 15 tơdrong vă jang hlôi jang keh đang đơ̆ng 90% năm tơ̆ lơ. Tơdrong iŏk đei jơnei ou mưh rim Khul bơ̆ jang jur hloi tơ tơring, atŭm hăm tơring păng bơngai tơmơ̆t jên jang hơlen hơdăh dôm tơdrong tơhlăk tơhlin, sơkơ̆t hơdăh dôm tơdrong kăl tơlang păng hơnăp jang kơ rim hơnih jang. Atŭm hăm ‘noh, kơƀang tơbăt jang keh đang đei chih tơbăt rim năr tơgŭm ăn kơdră chĕp pơgơ̆r dêh char ƀôh hơdăh dôm tơdrong vă jang iung jang hiơ hiơ̆ vă xek tơlang tơtom. Hloh đơ̆ng ‘măng iung jang, Ƀĭ thư Đảng dêh char Đắk Lắk Lương Nguyễn Minh Triết hơlen, dôm tơdrong tơhlăk tơhlĭn kơ rim tơdrong vă jang đei ƀôh lơ̆m pơgơ̆r jang kiơ̆. “Lơ tơdrong jang hơdrol ou ki bơ̆n akhan tơnap, akhan tơhlăk tơhlin trong tơlĕch jang, mă lei mưh kơdră jur năm hloi tơ̆ hơnih păng atŭm hăm rim hơnih bơ̆ jang, rim kang ƀô̆ bơ̆ jang iok tơvih teh hơlen hơdăh hơnăp jang, pơm hơdăh jơ ‘năr jang ‘noh lơ tơdrong jang hlôi keh đang ‘noh gơh vă xek tơlang ăn hloi.”

Tơdăh iŏk tơvih teh jĭ mĭnh lơ̆m dôm tơdrong kăl hloh vă tơlĕch jang kiơ̆, lei tơlĕch kon jên teh đak tơmơ̆t jang tŏk bŏk jĭ mĭnh tơdrong jang trăp trĭn hăm Đắk Lắk lơ̆m dôm khei hơtuch sơnăm. Tơ̆ ‘măng hop akŏm joăt joe khei 8 ou ki, kơdră chĕp pơgơ̆r dêh char ‘măn lơ jơ ‘năr păng hơlen tơdrong tơlĕch jên jang. Trong pơprŏ kon jên teh đak tơmơ̆t jang sơnăm 2026 kơ Đắk Lắk hloh 11.294 ti hlak jên. Truh dang ei, dêh char hlôi klăh asong hloh 9.918 ti hlak jên, jơnei vă jê̆ 88%. Mă kăl, oei 1.375 ti hlak jên tim mă đei tôm rơvơn pơjao ăn kon jên jang.

Kiơ̆ đơ̆ng Kơdră chĕp pơgơ̆r Hơnih bơ̆ jang jên hu dêh char Đắk Lắk Cao Đình Huy, khei 8 kiơ̆ trong tơlĕch ăn lei kăl tơlĕch kon jên jang tŏ sĕt hloh 3.000 ti hlak jên mă lei ‘nao lăp tơlĕch ăn dang 604 ti hlak jên. Vă jang keh đang trong tơlĕch jang kon jên tơmơ̆t jang kiơ̆ trong pơprŏ jang jăl III, hơdrô̆ lơ̆m khei 9, dêh char kăl iung jang dang 5.154 ti hlak jên. Hơnih bơ̆ jang jên hu dêh char hlôi bơ̆ jang hăm rim tơ-‘ngla tơmơ̆t jên jang đei ƀơm truh, athei pơkăp iung jang keh đang.“Dang ei, Hơnih bơ̆ jang vei lăng jên hu dêh char hlôi ƀơk ăn kiơ̆ trong ăn tŏk iŏk hơdrol păng lăp ăn dôm tơdrong vă jang hlôi đei jang keh đang. Rim giĕng nhôn gô athei rim Hơnih vei lăng tơƀôh ăn lei nhôn gô ƀơk ăn hloi hăm dôm tơdrong jang hlôi iung jang keh đang. Lơ̆m mă rim hơnih ưh kơ gơh vă kla ăn lei nhôn iŏk pơdreo vă ƀơk ăn rim tơdrong jang hlôi jang keh đang anai.”

Hrei ou dang 60% tơdrong tơlĕch kon jên teh đak tơmơ̆t jang kơ Đắk Lắk akŏm lơ̆m 4 Hơnih jang Vei lăng tơdrong vă jang, đei Hơnih vei lăng tơdrong vă jang Trong gre nơnăm păng Choh jang sa, Hơnih Tơmơ̆t jên jang Ming man păh Hơlĕch, Hơnih jang Buôn Ma Thuột păng Hơnih jang Tuy Hòa. Tơ̆ hơnăp tơdrong pơkoel kăl pơjing đei dôm tơdrong tơplih hơdăh lơ̆m kon jên teh đak tơmơ̆t jang, iŏk tơvih teh păng rim hơnih jang tơm, Kơdră chĕp pơgơ̆r Hơnih vei lăng kon pơlei dêh char Đắk Lắk Đỗ Hữu Huy athei tơroi mă hơdăh kĕ vă tơlĕch kon jên jang kơ rim tơdrong vă jang, rim hơnih jang; iŏk tơvih hloi kon jên jang kơ dôm tơdrong vă jang ưh kơ keh đang ăn rim tơdrong jang ‘meh vă đei kon jên jang păng gơh vă kla ăn kon jên jang. Kơdră chĕp pơgơ̆r dêh char athei atŏk kơtang dăr lăng hloi tơ̆ hơnih ming man, hơlen hơdăh tơdrong kĕ jang lơ liơ kơ hơnih tơmơ̆t jên jang. Dôm bơngai tơmơ̆t jên jang iung jang ưh kơ keh đang ‘noh kăl lăng hơlen tơplih bơngai anai, veh ver tơdrong jang ưh kơ ‘lơ̆ng pơm jing tơdrong tơhlăk tơhlĭn ăn ming man keh đang păng tơlĕch kon jên jang.“Hơnih bơ̆ jang kăl tơroi tơbăt ăn hloi Kơdră chĕp pơgơ̆r Hơnih vei lăng kon pơlei dêh char tơdrong pơjao ăn Kơdră chĕp pơgơ̆r Hơnih bơ̆ jang iŏk vei lăng rim tơ-‘ngla tơmơ̆t jên jang păng trong vă năm iung jang dăr lăng, pơrô̆ iung jang ming man. Yak năm hloi tơ̆ hơnih ming man, lăng năng bơngai tơmơ̆t jên jang hăm đei kmăi kmŏk gre ou to ưh, đe sư hăm đei kô̆ng nhân ưh; iŏk đĭ đăng hla bơar chih tơbăt ming man vă lăng hơlen jang keh đang dang yơ. Lăng hơlen sơđơ̆ng lơ lou đơ̆ng dang ei truh đĭ sơnăm tơlĕch kon jên jang dôm yơ. Tơdăh lơ̆m jơ ‘năr tơhlăk tơhlĭn kơ yuơ bơngai tơmơ̆t jên jang iung jang ưh kơ lĕ lei kăl tơplih hloi bơngai tơmơ̆t jên jang.”

Đơ̆ng iung jang iŏk tơvih teh truh pơtrŭt tơlĕch kon jên teh đak tơmơ̆t jang, Đắk Lắk tŏk bŏk tơlĕch ăn mĭnh trong jang ‘nao: dăr lăng kơjăp hơnih ming man, xek tơlang truh tôch dôm tơdrong tơhlăk tơhlĭn păng hơlen jang keh đang hăm hơnăp jang hơdăh. ‘Nou đei lăng jĭ trong kăl hloh vă pơjing ‘lơ̆ng hơ iă lơ̆m dôm khei hơtuch sơnăm, atŏk kơtang iung jang ming man keh đang rim tơdrong vă jang, iŏk yoa jơnei kon jên tơmơ̆t jang păng hrôih hơnhăk dôm tơdrong vă jang đei tơmơ̆t yoa ‘lơ̆ng hơ iă, iŏk đei jơnei.