VOV4.Bahnar - Tơ̆ dêh char Dak Lak hrei ‘nâu đei truh 36 tŏ anih pơ truh đak man ăn tơ pôl tơ̆ tơ ring tơ rang hư pơ chăh, ƀât lăp ưh pă gơ̆h yoa. Tơ drong ‘nâu tôch huach mưh 1 pôm anih pơ truh đak đei tơ lĕch truh kơ ti hlak jên man, mă lei kon pơ lei oei hơ nơ̆ng ưh kơ măh đak rơ gŏh vă sŏ yoa.

Anih pơ truh đak tơ̆ plei Trap, xăh Cư M’gar, apŭng Cư M’gar đei man đơ̆ng sơ năm 2017 truh sơ năm 2019 ‘nŏh man đang. Akŏm đĭ đang jên man, tơ trơp bơ̆n đing ‘nŏh 12 ti đơ̆ng jên tĕh đak, pơ truh đak rơ gŏh ăn vă jê̆ 500 unh hnam kon pơ lei tơ̆ dôm plei Linh, plei Trap păng plei Thung. Yă H’bun Kbuôr tơ̆ plei Trap tơ roi, anih pơ truh đak âu lăp gơ̆h yoa 2,3 khei đĕch, đang kơ ‘nŏh ưh gơ̆h iŏk yoa 3 sơ năm âu ki, dang ei hŭt hơ chăng hŏh hloi, ngiĕt chăt ƀĕnh. Unh hnam oei tôch mơ mat tat găh đak yoa: “Ưh pă đei đak kơ măy ‘nŏh unh hnam athei sŏ săi đak kuay dơ̆ng. Pơ yan phang đak kuay hrơ̆, nhôn athei năm pinh đak mă ưh ‘nŏh năm răk đak vă pai xa, sŏ nhă; oei đak hum, pih hơ băn ao ‘nŏh iŏk gre công nông chơ đơ̆ng dơ nâu sŭng”.  

Lơ̆m dêh char Dak Lak hrei ‘nâu đei 36/123 tŏ anih pơ truh đak ưh páw đei yoa

Tơ blang găh tơ drong tơm pơm ăn anih pơ truh đak rơ gŏh đei man truh 12 ti hlak jên lăp yoa 2.3 khei đĕch, yă Phạm Thị Tiềm – Kơ dră vei lăng kon pơ lei xăh Cư M’gar, ăn tơ băt, tơ drong tơm ‘nŏh yoa đơ̆ng vei lăng, iŏk yoa ưh ‘lơ̆ng. Blŭng a, xăh pơ jao ăn 3 ‘nu ƀok pơ gơ̆r pơ lei vang vei lăng đak âu. Đei 2,3 khei, 3 ‘nu bơ ngai âu kuă, ưh ‘mĕh vei lăng yoa akhan thu jên kon pơ lei vă kla jên điên ăn kơ măy kơ dâu ưh đei. Sơ năm 2020, xăh pơ jing Khul vei lăng anih pơ truh đak rơ gŏh plei Trap. Mă lei, yoa bơ̆ jang ưh gơ̆h păng tơ drong thu iŏk jên điên đơ̆ng kon pơ lei mơ mat tat kơ na tơ drong iŏk yoa anih pơ truh đak âu jing pơ dơ̆h dơ̆ng.

Yă Phạm Thị Tiềm pơ ma hơ dăh: “Anih vei lăng kon pơ lei xăh đei nơ̆r apinh vă pơ jao ăn Anih pơ truh đak rơ gŏh păng vei lăng cham char kơ Anih vei lăng tơ drong choh jang xa păng atŏk tơ iung tơ ring tơ rang dêh char vei lăng dơ̆ng, tơ̆ xăh nhôn ưh đei bơ ngai hlôh vao vă vei lăng anih pơ truh đak âu. Nhôn tôch pơ ngơ̆t yoa mưh hư ƀât yơ, pơ chăh yă kiơ lơ̆m tĕh măt lăng ưh kơ ƀôh, ưh băt vă hơ met thoi yơ. Kơ na athei pơ jao ăn anih juăt jang vă gơ̆h đei yoa ‘lơ̆ng.”

Dôm anih pơ truh đak rơ gŏh tơ̆ tơ ring hư pơ chăh, huach lơ ti hlak jên tĕh đak, kon pơ lei ưh đei xa yoa kiơ

Tơ drong dăr hơ len năng đơ̆ng Anih pơ truh đak rơ gŏh păng vei lăng cham char Dak Lak ăn ƀôh, jơ̆p lơ̆m dêh char đei truh 36 lơ̆m kơ sô̆ 123 tŏ anih pơ truh đak tơ̆ tơ ring hư pơ chăh, pă gơ̆h yoa. Tơ drong tơm ‘nŏh yoa tơ mât jên jang tŏ sĕt, răh rai, hui bơ ngai yoa đak, oei jên điên kla ăn kơ măy kơ dâu ‘nŏh ưh kơ măh. Lơ anih pơ truh đak đei pơ jao ăn xăh, ƀât lăp pơ jao ăn pơ lei vei lăng hloi; kăn ƀô̆ vei lăng ưh đei hlôh vao tôm kơ na jing đei tơ drong hư răm, ưh đei yoa đŏng nŏh jing đei tơ drong hŭt hơ chăng lê̆.

Kiơ̆ ƀok Phạm Ngọc Bình – Kơ dră Anih pơ truh đak rơ gŏh păng vei lăng cham char Dak Lak, vă iŏk yoa dơ̆ng anih pơ truh đak tơ̆ tơ ring tơ rang, anih jang oei jang hơ doi hăm Dơ nŏ anih vei lăng kon pơ lei dôm apŭng, thĭ xăh, plt pơ gơ̆r hơ len năng, tơ lĕch trong hơ met ming; atŭm hăm ‘nŏh hơ tŏk tơ drong tơ roi tơ băt ăn kon pơ lei găh tơ drong đei yoa đơ̆ng đak rơ gŏh. Tơ̆ hơ năp ning mônh kơnh dêh char kăl đei trong jang krao hơ vơn tơ pôl vang jang pơ truh đak rơ gŏh, tơ lĕch jên man đei dôm anih pơ truh đak kơ jăp ‘lơ̆ng, đei yoa ƀiơ̆:

“Tơ̆ hơ năp kơnh mưh đei jên tơ mât jang,‘nŏh dôm anih jang đei pơ jao pơm tơ ‘ngla tơ mât jên man athei tơ chĕng hơ len vă pơm thoi yơ dôm anih pơ truh đak, đei man tih ‘lơ̆ng ƀiơ̆, gơ̆h pơ yoa ăn lơ bơ ngai ƀiơ̆, đơ̆ng nŏh jên jang đei tơ jur, đei iŏk yoa ‘lơ̆ng biơ̆. Găh tơ drong pơ jao ăn anih vei lăng kŭm tôch gĭt kăl, athei pơ lung dôm anih jang vang iŏk jang tơ drong ‘nâu vă gơ̆h vei lăng, ăn kơ măy kơ dâu ‘lơ̆ng, đei yoa kiơ̆ tơ drong hơ găt”.

Tuấn Long: Chih

Dơ̆ng: Tơ blơ̆