VOV4.Bahnar - Kơ sơ̆ ‘năr 19/7, Anih vei lăng kon pơ lei apŭng Krông Păch, dêh char Dak Lak pơ gơ̆r hop akŏm tơ roi tơ băt hăm khŭl chih kơ tơ̆ng ang roi tơ ƀôh tơ drong jang “ Lêh sầu riêng apŭng Krông Păch” ‘măng mă mônh, sơ năm 2022, vă hơ tŏk ‘lơ̆ng kơ loăi ‘long pơ tăm tơm kơ tơ ring ‘nâu. Hăm hơ năn “ Hơ tŏk ‘lơ̆ng  sầu riêng Krông Păch”, lêh gô pơ gơ̆r đơ̆ng ‘năr 1/9 –3/9/2022 hăm lơ tơ drong jang: Hop akŏm pơ trŭt krao hơ vơn tơ mơ̆t jên jang păng hơ tŏk tơ iung tơ mam đơ̆ng choh jang sa đei, choh jang sa kơ jăp apŭng Krông Păch; lêh trong kơ phô̆; pơ gơ̆r hơ ri brông păng tôn chĭng chêng apŭng Krông Păch; chă năm lăng tơ̆ anih tơ mang lăng pơ gar CaDa; rơih iŏk “Pơ gar sầu riêng ‘lơ̆ng - rơ goh hăm cham char” păng sa sầu riêng tơ̆ pơ gar, jơ nŭm kơ chơ pơ dă tĕch dôm tơ mam OCOP…

Bơ ngai mơ dro năm răt sầu riêng ăn kon pơ lei jang chn mir tơ̆ apŭng Krông Păch

Jĭ tơ ring đei teh sầu riêng iŏk đei 1/4 teh sầu riêng kơ lơ̆m dêh char Dak Lak, sầu riêng hlôi jing ‘long pơ tăm tơm hơ nhăk ăn iŏk yua tơm ăn kon pơ lei păng tơ gop hơ tŏk tơ iung mŭk drăm tơ̆ tơ ring. Lêh sầu riêng apŭng Krông păch ‘noh jĭ ‘măng pôk pơ ư bơ ngai pơ tăm sầu riêng păng dôm kơ jă kăp gĭt mŭk drăm đơ̆ng kơ loăi plei ‘long ‘nâu hơ nhăk ăn. Hơ dai hăm kiơ̆ đơ̆ng lêh âu vă tơ goăt, roi tơ ƀôh găh tơ mam pran, tơ drong hiôk tơ mơ̆t jên jang lơ̆m pơm tơ lĕch păng tĕch plei sầu riêng tơ klep hăm hơ tŏk tơ iung joh ayŏ, tơ mang lăng tơ ring truh anih tĕch mơ dro lơ̆m păng ‘ngoăih teh đak.

Thuem: Tơ blơ̆