VOV4.Bahnar - Kŭm hăm đe ŏh hŏk tro lơ̆m tĕh đak, ‘năr 7-7, hlŏh 20.000 ‘nu hŏk tro tơ̆ Dak Lak mât lơ̆m năr thi mă blŭng kơ ‘măng thi tốt nghiệp trung học phổ thông sơ năm 2022. Hơ dai hăm tơ drong adrin đơ̆ng kơ dih kâu đe ŏh ‘nŏh jĭ đon pơ ngơ̆t đơ̆ng mĕ ƀă păng tơ pôl vang tơ gŭm.

Đe hŏk tro đei dôm bơ ngai jang tơ gŭm chĕp ăn đak nhă

Kiơ̆ tơ drong hơ găt đơ̆ng Anih tơm vei lăng pơ tho pơ hrăm, 6h30 hŏk tro athei đei măt tơ̆ anih thi. Hăm tơ drong hơ găt ‘nao lơ̆m sơ năm ‘nâu, hŏk tro athei gơih tơ mam yoa kơ dih, ming hơ tăih 25m, đơ̆ng rŏng kơ ‘nŏh hơ kŭm tơ̆ hơ năp ‘măng lăm thi gô thây kô vei lăng thi krao mât.

Vă pơm ‘lơ̆ng ăn jơ pơm ƀai, đơ̆ng 6h, lơ hŏk tro păng mĕ ƀă hŏk tro đĭ đei măt tơ̆ anih thi bơih. Vă tơ gŭm ăn hŏk tro lơ̆m jơ thi, khul jang tơ gŭm pơ yan thi tơ̆ dôm anih thi pơ tho ăn hŏk tro mât tơ̆ lăm thi. Hăm tơ drong tơ rĕk đơ̆ng mĕ ƀă păng tơ drong tơ gŭm tôch pơ nĕh đơ̆ng tơ pôl, đe hŏk tro tơ̆ Dak Lak sơ đơ̆ng jơ hngâm, mât lơ̆m ‘măng thi tốt nghiệp THPT sơ năm 2022.

Dơ̆ng: Tơ blơ̆