Rơih hơmet bơngai mât jang lơ̆m Khul kơdră chĕp kơ̆l Đảng ƀô̆ dêh char đei 122 ‘nu bơngai, Kơdră pơgơ̆r Anih chĕp kơ̆l Đảng dêh char đei 38 ‘nu. Khul kăn ƀô̆ đei rơih hơmet âu pơm lăp hăm tơdrong rơih bơngai jang pơ ‘yoi dơ̆ng, pơtăl băl păng tưk tơiung ‘lơ̆ng tơdrong tơmât hơdai đơ̆ng dôm jơhnơr; đei lơ bơngai rơgei, đei jơhngâm đon chinh trĭ ‘lơ̆ng, gơ̆h chĕp kơ̆l pơgơ̆r păng đei bơngai nai lui yom.

Pơma tơ̆ hop akŏm, Bí thư Đảng dêh char Đắk Lắk Lương Nguyễn Minh Triết pơma hơdăh, rơih hơmet bơngai jang athei pơjing đei khul kăn ƀô̆ jang pơtăl dơ̆ng mă rơgei tơpă, pơm lăp hăm tơdrong ‘mĕh vă jang tŏk lơ̆m chăl ‘nao. Kăn ƀô̆ athei tơplih ming đơ̆ng vei lăng jing pơjing tơdrong ‘lơ̆ng vă jang tŏk, kơchăng tơplih ‘nao đon tơchĕng, trong bơ̆ jang.