Jơnŭm jang Kon pơlei jang mir dêh char Đăk Lăk 'nao pơgơ̆r lơ tơdrong tơroh jang pơdro xa, tơbang păng tĕch tơlĕch tơmam choh pơtăm, hơvơn bơngai jang mir, jơnŭm păng hơp tak xah vang jang. 650 tơmam drăm kăp gĭt păng tơmam OCOP đei tơbang ah 34 hơnih tĕch, pơm trong hiôk tơroh kơtă hăm hơnih jang mŭk drăm păng bơngai răt yua. Hơnih hơdah hloh noh atŭm hăm tơmam drăm kơtă, kon pơlei đei pơtho gah trong chă tơbang, tĕch tơmam lơ̆m mạng kơmăi kơsô̆. 'Nou đei lăng jĭ trong jang pơm kơđeh tơdrong pơtăm păng tĕch tơlĕch, mă kăl noh lơ̆m khei năr bơngai răt yua roi năr roi đei lơ tơdrong rơih tĕch răt kiơ̆ trư̆k tuyê̆n.

Ƀok Lê Xuân Cường, jang lơ̆m Jơnŭm bơngai jang mir xah Ea Súp akhan, tơdrong 'lơ̆ng hăm tơmam choh pơtăm đei hơtŏk, mă lei tơdrong tĕch răt, tơbang tơmam drăm păng pơjing hơnăn ăn tơmam drăm đơ̆ng kon pơlei jang mir tam mă kloh klĕch. Kơyuơ noh, tơplih kơmăi kơsô̆ kăl đei pơtho hơdah vă kon pơlei gơh iŏk yua hloi lơ̆m rim tơdrong choh jang, tơbang truh tĕch tơlĕch tơmam drăm: "Bơngai jang mir bơ̆n pơm tơlĕch lơ tơmam drăm 'lơ̆ng. Mă lei, tơdrong hơnhăk dôm tơmam drăm ou gơh tĕch tơlĕch lơ̆m tơring 'noh oei ƀơm lơ tơnap tap. Dang ei, pơm kiơ̆ Tơchơ̆t 57 đơ̆ng Hơnih tơm Chính trị gah hơtŏk kơtang tơplih kơmăi kơsô̆, bơ̆n pơtơm dôm tơdrong pơtho tơƀôh chă pơm jang ăn kon pơlei iŏk yua tơplih kơmăi kơsô̆ ăn rim tơdrong pơm tơlĕch tơmam drăm, tơbang truh iŏk yua đei pơtơm lơ̆m mạng tơpôl ngăl, hơnhăk tơmam choh pơtăm gơh tĕch truh lơ tơring hloh"  

Khul kon pơlei choh jang sa dêh char Đăk Lăk tơbăt, rim Khul gô hơnơ̆ng tơgŭm djru ăn rim bơngai lơ̆m khul pơih să trong tĕch mơdro tơmam drăm lơ̆m hơnih tĕch pơdro kơsô̆, băt hơdăh kmăi kmŏk pơơm tơlĕch ‘lơ̆ng păng pơm hơtŏk kơtang choh jang sa pơm tơlĕch, tĕch mơdro. Atŭm hăm ‘noh tơgŭm djru kon jên jang ‘moi kiơ̆ Hơnih mong jên tơgŭm djru kon pơlei choh jang sa, pơtho tơbăt tơdrong jang tang măt hăm hơnih mong jên păng pơtho tơbăt dôm tơdrong hlôh vao ăn kon pơlei choh jang sa pơm tơlĕch, tĕch mơdro hơgei.

Yă H Giang Niê, Kơdră chĕp pơgơ̆r Khul kon pơlei choh jang sa Đăk Lăk  sơkơ̆t hơdăh, tơplih jơhngơ̆m đon jang xa, tơmơ̆t choh jang sa hăm tơdrong ‘meh vă răt iŏk ‘noh jing tơdrong kăl hloh. Mưh kon pơlei băt iŏk yoa kmăi kmŏk, jang hloi tơƀôh tơbăt tơmam drăm păng tơchă bơngai răt yoa, kơjă tơmam drăm gô ưh khan lăp lơ̆m tơdrong choh jang sa mă oei pơm hơtŏk loi dơ̆ng lơ̆m tơdrong pơm tơlĕch tơmam drăm păng tĕch mơdro:  "Khul hlôi tơlĕch jang hơnơ̆ng vă kon pơlei gơh iŏk yoa lơ̆m tơplih kơsô̆, hơnih tĕch răt păng rim kmăi kmŏk pơm tơlĕch tơmam drăm. Đơ̆ng noh, tơgŭm ăn tơmam drăm kơ kon pơlei đei jing tơmam drăm đei hơnơ̆ng lơ̆m prăt sơnăm. Nhôn ‘meh vă gô pơjing dôm “kon pơlei kơsô̆” păng "hơp tak xah kơsô̆” vă vang yak hơdoi lơ̆m ‘măng tơplih kơsô̆."