VOV4.Bahnar - Gơ măng 10/7, tơ̆ Hnam jŏh hơ ri hơ xoang dêh char Dak Lak, Khul jang tơ gŭm Dak Lak jang hơ doi hăm Anih vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng Dak Lak pơ gơ̆r gơ măng jang tơ gŭm Tơ drong ‘lơ̆ng hơ iă đơ̆ng plei nuih. Kiơ̆ đơ̆ng noh vang mong akŏm đei hlŏh 660 triu hlak jên pơ ‘nhŏ ăn dôm tơ drong jang tơ gŭm nhen pơ tho glơi păng tưk tơ iung tơ drong tanh brai vai khăn tơ̆ tơ ring.

Anih pơ gơ̆r pơ jao hla ar bơ nê ăn dôm bơ ngai, khul grŭp vang tơ gŭm

Lơ̆m tơ drong joh hơ ri oei pơ gơ̆r pơ jao 2 tŏ chơ khŏ tanh kăp gĭt yoa bơ ngai juăt tơ drong hơ len tơ drong jŏh ayŏ kơ dŏ xoang La Quốc Bảo pơm, ‘măn hơ drô̆ ăn Khul jang tơ gŭm Dak Lak. Chơ khŏ âu gô đei tĕch vă iŏk jên pơ yoa ăn tơ drong jang tơ gŭm dŏng. Anih pơ gơ̆r hlôi iŏk mong đei hlŏh 660 triu hlak jên đơ̆ng rim bơ ngai, khul grŭp vang tơ gŭm. Đĭ đăng jên âu vă pơ yoa ăn tơ drong pơ tho glơi ăn đe hơ iŏh păng pơm hnam kơ jung Rađe pơm anih tanh brai vai khăn, ming pơ dă tơ mam đơ̆ng đe drŏ kăn tanh đei tơ̆ xăh Dray Bhăng, apŭng Cư Kuin. 

Dơ̆ng: Tơ blơ̆