VOV4.Bahnar - Lơ̆m 2 năr (24-25/3), apŭng Cư Kuin, dêh char Dak Lak pơ gơ̆r Hop akŏm bơ ngai tang măt Đoàn TNCS Hồ Chí Minh ‘măng mă 4, jăl jang 2022-2027. ‘Nâu jĭ anih đoàn lơ̆m tơ ring kon kông đei Anih jang đoàn dêh char Dak Lak rơih pơ gơ̆r Hop akŏm pơ long năng hơ drol.

‘Nâu jĭ Hop akŏm pơ long năng lơ̆m tơ ring kon kông đơ̆ng druh dăm Dak Lak

Kiơ̆ hla ar chih tơ roi lơ̆m hop akŏm, lơ̆m 5 sơ năm âu ki, tơ drong jang đoàn păng khul druh dăm tơ̆ apŭng Cư Kuin iŏk đei lơ tơ drong jơ nei ‘lơ̆ng nhen: man păng hơ met ming 31 anih ngôi pơ chơ̆t ăn đe hơ iŏh, hnam oei ăn kon pơ lei, hnam oei ăn hơ iŏh, hŏk tro đei tơ drong arih xa mơ mat tat. Tơ gŭm păng roi tơ ƀôh, chă tơ drong jang ăn 5.500 ‘nu druh dăm păng tơ gŭm 72 ‘nu druh dăm kơ chu hơ met jơ hngâm đon mât oei xa ‘lơ̆ng hăm tơ pôl dơ̆ng.

Pơ gơ̆r dôm jĭt lăm pơ tho glơi păng pơ tho trong arih xa ăn hơ iŏh. Dôm anih jang đoàn tơ̆ tơ ring oei bơ̆ jang đei 44 tơ drong jang druh dăm, hăm kơ sô̆ jên hlŏh 650 triu hlak jên. Hop akŏm hlôi pôk rơih Khul kơ dră chĕp kơ̆l Đoàn TNCS Hồ Chí Minh apŭng Cư Kuin mă 4, jăl jang 2022-2027, đei 21 ‘nu păng pôk rơih tơ păt bơ ngai pơm Bí thư lơ̆m jơ hop akŏm hloi.

Dơ̆ng: Tơ blơ̆