VOV4.Bahnar - Yoa ƀơm ưh ‘lơ̆ng đơ̆ng jĭ Covid19, lơ hơ iŏh hŏk mầm non tơ̆ Dak Lak ưh đei năm hŏk tơ̆ hnam trưng. Mă loi hơ iŏh tơ̆ plt Buôn Ma Thuột, akŏm đĭ đăng jơ hŏk kơ tă tơ̆ lăm tam mă truh 2 giĕng. Vă mĕ ƀă sơ đơ̆ng jơ hngâm, păng pơ jing tơ drong ‘lơ̆ng hlŏh ăn hơ iŏh 5 sơ năm mât hŏk lăm 1, Anih vei lăng pơ tho pơ hrăm Dak Lak oei jang lơ trong tơ gŭm ăn hơ iŏk lơ̆m grŭp sơ năm ‘nâu.

Sơ năm hŏk 2021-2022, jăl hŏk mầm non tơ̆ plt Buôn Ma Thuột, pơ tho hŏk kơ tă tơ̆ hnam trưng tam mă truh 2 giĕng

Vă pơ jing tơ drong ‘lơ̆ng ăn hơ iŏh 5 sơ năm mât hŏk lăm 1, Kơ dră vei lăng pơ tho pơ hrăm dêh char Dak Lak, Phạm Đăng Khoa ăn tơ băt, Anih vei lăng athei dôm hnam trưng kuay video pơ tho ăn mĕ ƀă băt trong pơ tho, vei lăng, pơ hrăm ăn hơ iŏh 5 sơ năm. Lơ̆m nŏh, hăm dôm hnam trưng đei lơ hŏk trong bơ ngai kon kông, đei lơ mon pơ ma nơ̆r yoăn tam gan gơ̆h, đe kô athei jang hơ doi kơ jăp hăm unh hnam vă tơ gŭm, pơ tho ăn hŏk tro hŏk nơ̆r yoăn adrol kơ mât hŏk lăm 1.

Dơ̆ng: Tơ blơ̆