VOV4.Bahnar - Pơgê năr 26/1, Khŭl chĭh kơtơ̆ng ang dêh char Dak Lăk jang hơdoi hăm Dơnŏ anĭh vei lăng Kơtơ̆ng ang păng Pơre nơ̆r păng Hnam mong răk kơsơ̆p hla bơar dêh char Dak Lăk pơgơ̆r blŭng a Jơnŭm Ƀăo Puih mak Nhâm Dần 2022. Đei pơgơ̆r đơ̆ng năr 26/1 trŭh đĭ năr 4/2 kơnh, Jơnŭm Ƀăo Puih mak Nhâm Dần dêh char Dak Lăk pơdă hlŏh 250 tơmam drăm ƀăo păng hlŏh 400 kơsơ̆p hla bơar rim kơ loăi.

Kiơ̆ đơ̆ng khŭl chĕp pơgơ̆r hơlen, rim hla bơar ƀăo puih mak sơnăm au đei pơm tơlĕch tôch ‘lơ̆ng lơ tơdrong, tơƀô̆h hơdăh tơdrong tơchăr chĭh tơlĕch tôch ‘lơ̆ng hơ iă găh kơđŏh păng dôm nơ̆r ƀơ̆r pơma lơ̆m hla bơar, hăm rim tơdrong chĭh tơbăt găh chơt hơ iă kơ Đảng, chơt hơ iă Puih mak, ƀlŏk hơdơ̆r hôn bơnê kơ Ƀok Hô, tơdrong iŏk đei jơnei kơ rim hơnĭh bơ̆ jang, tơring tơrang păng rim răih kon pơlei. Tơbăt hơdăh tơdrong jang chĭnh trĭ, mŭk drăm, tơpôl, jơhngơ̆m đon nuih mơng pran kơtang kơ kon bơngai Việt Nam, tơdrong iŏk đei jơnei lơ̆m chŏh jang sa, pơm tơlĕch tơmam drăm lăng trŭh lơ̆m đunh đai tai sơnăm ‘lơ̆ng rŏ hơbŏ nhen kơ tĕh đak. Đơ̆ng rŏng Jơnŭm ƀăo puih mak, rim hla bơar ƀăo au gô pơtrŭh pôk ăn rim kang ƀô̆, ƀô̆ đô̆i tơ̆ achon dơsĭ Trường Sa, găh Dơnŏ anĭh Ƀô̆ đô̆i vei lăng Đak dơsĭ tơring 4, dêh char Khánh Hòa.

Tơblơ̆ nơ̆r: Amazưt