Kiơ̆ kơ ƀok Y Linh Niê, phŏ Kơdră Măt trâ̆n tôh kuôk Việt Nam xăh Cư Prao, pơlei Pa, pơlei Năng păng pơlei Hoang đei 346 unh hnam hăm 1.440 măt bơngai, lơ̆m noh bơngai  Ê Đê đei hloh 90%.

Rim xơnăm, ăh 'Năr tơguăt tơguăl tôm kon pơlei, jơnŭm pơgơ̆r tơring pơgơ̆r tơdrong jang xơng kơ kuh tơ̆ rim pơlei pơla, mă lei xơnăm âu Anih vei lăng kon pơlei xăh hlôi pơkăp pơgơ̆r tơ̆ tơring oei xa vă tơ-iung đon bơnôh tơguăt tơguăl tôm kon pơlei tơ̆ tơring. Vang năm akŏm 'Năr tơguăt tơguăl tôm kon pơlei tơ̆ tơring kơ xăh Cư prao, apŭng M’drak, ƀok Y Biêr Niê, Phŏ Ƀĭ thư anih jang kơpal dêh char Đăk Lăk ăn tơbăt, tôưdrong jang âu hlôi jing 'Năr akŏm tih kơ tơpôl kon pơlei hăm lơ tơdrong jang kăp gĭt, ƀenh kơ joh ayŏ juăt jue kơ unh hnam kon pơlei kon kông Việt Nam tơgop hơtŏk pơjing tơdrong tơguăt tơguăl tôm kon pơlei.