Lơ̆m ƀar năr 1-2/12, Anih jang Đảng dêh char Đăk Lăk pơgơ̆r Hop akŏm Ƀan châ̆p hanh Đảng ƀô̆ dêh char 'măng mă 16 (pơih xă) tơgop nơ̆r dôm tơdrong pơm kiơ̆ xơnong jang xơnăm 2022, tơlĕch trong jang ăn xơnăm 2023; tơdrong jang hơlen păng pơkăp kih luơ̆t lơ̆m Đảng; Pơkăp ăn dêh char Đăk Lăk jăl xơnăm 2021-2030, xơkơ̆t truh xơnăm 2050 păng đei hơmet tơplih Pơkăp pơm jang đơ̆ng Ƀan châ̆p hanh Đảng ƀô̆ dêh char jăl 17, jăl jang 2020-2025. 

Pơma ăh hop akŏm, ƀok Nguyễn Đình Trung, jang lơ̆m Trung ương Đảng, Ƀĭ thư anih jang đảng dêh char Đăk Lăk pơkăl, dôm jăl jang Đảng kơ rim anih jang, rim tơring tơpăt xơkơ̆t dôm tơdrong oei tơjruh vă chă trong hơmet pơ- 'lơ̆ng. Atŭm hăm noh, kơchăng păng tơguăt xơnong jang dơnơm vă pơm kiơ̆ dôm tơchơ̆t pơm jang hlôi tơlĕch. Lơ̆m noh, akŏm pơm kiơ̆ Tơchơ̆t  23 đơ̆ng Anih tơm Chĭn trĭ găh trong pơkăp hơtŏk mŭk drăm tơpôl tơring Tây Nguyên, Tơchơ̆t dơnơm kăp gĭt ăn pơlei tơm Buôn Ma Thuột, tơlĕch dôm tơdrong jang dơnơm kơ dêh char, pơm kiơ̆ jơnŭm pơgơ̆r sô̆, tơring kơdrâ̆m gơh rơgei; hơmet tơdrong pơdơh axong jên jang kŏng.