Kiơ̆ tơroi tơbăt, 5 sơnăm âu ki, dêh char Dak Lak hlôi sơng đei tơmơ̆t jên jang păng tơlĕch jang 30 tơdrong jang tơmang lăng păng anih jang, tơmam pơvih pơvăn ăn tơmang lăng, akŏp jên 718 ti. Mă lei akŏp kơ sô̆ tơmoi truh tơ̆ dêh char khei ‘năr âu lăp jô̆ pơhlom đei vă 4 triệu ‘nu, tơmoi tơmang lăng tŏk jô̆ păh lăp 1 sơnăm iŏk đei 5,3%.

Akŏp iŏk đei đơ̆ng tơdrong jang tơmang lăng lơ̆m 5 sơnăm lăp jô̆ pơhlom đei vă 3.700 ti hlak jên. Vă hơmet ‘lơ̆ng mŭk drăm tơmang lăng tơ̆ tơring, hop akŏm hlôi tơlĕch 8 trong jang lơ̆m khei ‘năr đơ̆ng rŏng dơ̆ng, akŏm lơ̆m dôm tơdrong tơroi tơbăt tơplih ‘nao đon hlôh vao đơ̆ng kon pơlei găh hơtŏk tơiung tơmang lăng; hơnơ̆ng hơtŏk loi dơ̆ng tơdrong jang tơroi tơbăt, pơtrŭt roi tơƀôh tơmang lăng; jang pơkeh dôm tơdrong jang tơgŭm sơng đei tơmơ̆t jên jang, hơtŏk tơiung bơngai jang.