Lơ tơdrong jang pơjei băl hlôi jing hơnih hơdăh, păr ang pran kơtang lơ̆m tơdrong hơrih sa tơpôl: Tơdrong jang “Đĭ đăng lơ̆m teh đak vang tơgŭm pơjing tơring tơrang ‘nao” hăm 26 xăh jang đang ‘lơ̆ng, 4 xăh jang đang tơring tơrang ‘nao hơtŏk ‘lơ̆ng, hloh 760 tơmam OCOP, lơ̆m noh đei 2 tơmam 5 hơ nglŏng. Tơdrong jang “Yua kơ bơngai dơnuh hin - Uh kơ lê̆ bu đei hŭt lê̆ tơ̆ rŏng” tơgop hơnhăk kơsô̆ ŭnh dơnuh hin tơring kon pơlei kon kông jur oei pă 9,7%. Tơdrong jang “Kang ƀô̆, bơngai jang kơ teh đak pơjei băl pơm kiơ̆ pơma sa ‘lơ̆ng hơiă tơ̆ anih bơ̆jang” păng “Pơtho kon pơlei gơh yua kơmăy kơsô̆” hlôi pơtrŭt pran kơtang tơplih kơsô̆ lơ̆m đĭ đăng anih bơ̆jang, 100% hla ar bơ̆jang đei hơmet ‘lơ̆ng lơ̆m kơmăy điện tử.

Ƀok Tạ Anh Tuấn - Kơdră Anih vei lăng kon pơlei dêh char Đắk Lắk, Kơdră Jơnŭm Pơjei băl Pôk hơpăh dêh char - pơma hơdăh, ‘nâu jĭ Hop akŏm Pơjei băl ‘mêm kơ teh đak mă blŭng kơ dêh char đơ̆ng rŏng kơ tơmơ̆t hơdai, đei tơdrong ‘lơ̆ng chĭnh trĭ gĭt kăl, tơƀôh hơyak blŭng ăn jăl jang hơtŏk tơiung ‘nao - ưh khan lăp pơjei băl lơ̆m rim tơdrong jang, mă oei jing pơjei băl tơplih ‘nao đon tơchĕng vei lăng păng tơiung tơdrong hơpơi ‘meh yak tŏk đơ̆ng kon pơlei.