Hloh 130 'nu tang măt đei pơhrăm gah tơdrong tơplih kơmăi kơsô̆, tơdrong jang kon kông păng tơdrong gơh chă tơroi tơbăt, pơrô̆ pơrôp kon pơlei lơ̆m chăl 'nao dang ei. Đăk Lăk dang ei đei jê̆ 1.100 'nu bơngai lơ̆m 18 hơdrung bơngai, pơm gơng tơroh đơ̆ng rim hơnih jang pơgơ̆r tơring hăm kon pơlei kon kông.

Lơ̆m hop akŏm, rim bơngai tang măt đei pơhrăm gah 3 tơdrong tơm, noh hơtŏk tơdrong gơh yua kơmăi kơsô̆ ăn kon pơlei, tơjră hăm dôm tơdrong jou chere pơm tơklah tơdrong tơguăt tơguăl tôm kon pơlei păng tơchơ̆t tơgŭm ăn kon pơlei kon kông lơ̆m jăl jang 2026-2035. Tơdrong akŏm vă iŏk yua sơnong jang dơnơm kơ bơngai đei kon pơlei lui yom lơ̆m tơdrong jang hơtŏk mŭk drăm – tơpôl, vei sơđơ̆ng tơpôl tơ̆ tơring păng tơgŭm ăn kon pơlei gơh tơrĕk tơjê̆ hăm dôm tơdrong jang kơmăi kơsô̆.