VOV4.Bahnar - Vih hơ lơ̆k dơ̆ng tơ drong arih sa hmă ‘nao, dôm anih jang mơ dro sa lơ̆m păng ‘ngoăih dêh char Dak Lak tŏk bŏk hơ tŏk loi dơ̆ng chă rơ̆ih bơ ngai jang vă tơ iung ming jang sa, tơ drong hiôk bơ̆ jang đei pơ̆ih ăn bơ ngai jang tơ̆ dêh char.

Chĕp hla ar tơ roi đei gơ̆h năm jang tơ̆ teh đak Nhật, Nguyễn Anh Tú, thôn Hiệp Thắng xăh Quảng Hiệp, apŭng Cư Mgar, dêh char Dak Lak, tơ băt, lĕch ‘măng khoă hŏk găh kơ măy kơ mŏk ô tô kơ hnam trưng Kao đăng tơ drong jang dêh char Dak Lak đơ̆ng khei 7/2021, sư kŭm hlôi bơ̆ jang tơ̆ 1,2 hơ nih mă lei tơ drong jang ưh kơ sơ đơ̆ng. Lăp đơ̆ng rŏng kơ tơ̆ng ang tơ roi pơ̆ih ‘măng anih chă bơ ngai jang tơ̆ teh đak đe, sư nôp hla ar hla ar hô sơ ăn Anih roi tơ ƀôh tơ drong jang kơ dêh char Dak Lak. Đơ̆ng rŏng 2 ‘măng apĭnh jet sư hlôi đei 1 kŏng ti kơ Nhật rơ̆ih iŏk. Lơ̆m khei 3 sư hlôi năm tơ̆ pơ lei tơm Hồ Chí Minh hŏk nơ̆r Nhật păng dôm tơ drong jang kăl vă năm bơ̆ jang.

        “Oh kŭm năm jang tơ̆ ‘ngoăih bơ̆ih, oh ‘meh năm tơ̆ Nhật tơ chă jên khei sơ đơ̆ng đơ̆ng rŏng kơ dôm sơ năm brŏk tơ̆ teh đak vă rong arih kơ dih kâu. Tơ̆ hơ năp kơnh oh hơ drin hŏk nơ̆r Nhật vă jăh păr tơ̆ teh đak Nhật.”

        Đơ̆ng rŏng khei ‘năr tơ chă dôm tơ drong kơ tơ̆ng ang chă rơ̆ih bơ ngai jang, La Thị Thanh Lan, thôn 2 xăh Hòa Thuận, pơ lei tơm Buôn Ma Thuột kŭm tơ tĕnh tơ chă đei tơ drong jang lăp tơ̆ Kŏng ti tơ mang lăng Dak Lak. Sư tơ roi.

       “Joăt jang đơ̆ng oh ‘noh Kế toán anih jang mơ dro sa kơ na oh ling lang pơ̆ih lăng lơ̆m mạng dăh mă tơ̆ dôm ap kơ tơ̆ng ang tơ chă tơ drong jang vă chă hơ len lăng tơ drong jang mă lăp hăm đơ̆ng oh hŏk. Oh lăng đei Kŏng ti tơ mang lăng Dak Lak đei tơ drong jang iŏk jên kŭm tơ jê̆ hăm tơ drong jang Kế toán đơ̆ng oh hŏk kơ na oh ‘meh pơ long jang lăng.”

Bơ ngai jang chă tơ drong jang tơ̆ Anih roi tơ ƀôh tơ drong jang dêh char Dak Lak

          Đei măt lơ̆m ‘măng pơm hla ar tơ chă tơ drong jang tơ̆ Dak Lak, ƀok Lê Nguyên Phúc, kơ dră anih vei lăng bơ ngai jang kơ Kŏng ti TNHH Hoa Xuân Vina joăt pơm tơ lĕch chơ khŏ ƀa ta đă ƀŏng lŏng tơ plŏng kơ dâu tơ̆ hơ nih jang kơ măy kơ mŏk Nhơn Trạch, Đồng Nai tơ băt, Kŏng ti hlôi tơ goăt hăm Dak Lak hloh 7 sơ năm kơ âu păng hlôi iŏk yua hloh 5 rơ bâu ‘nu jang kơ dêh char. Dang ei Kŏng ti kŭm tŏk bŏk jang hơ dai hăm rim khŭl kơ dră tơ ring vă chă rơ̆ih lơ bơ ngai jang kŏng nhân.

        “Kŏng ti tŏk bŏk đei ‘meh chă bơ ngai jang đơ̆ng 1 rơ bâu truh 2 rơ bâu ‘nu bơ ngai jang phô thŏng, đơ̆ng 18 sơ năm tơ̆ kơ pal. Jên khei đơ̆ng 6 triệu pơh truh  14 triệu đei dôm tơ drong tơ gŭm nai đơ̆ng Kŏng ti, hơ dai hăm ‘noh Kŏng ti đei dôm tơ drong đei yua nhen hơ păh 3 triệu ăn bơ ngai jang ‘nao blŭng a truh bơ̆ jang, mă 2 ‘noh tơ gŭm hnam oei pơ gia lơ̆m dang 2 khei ăn bơ ngai jang truh bơ̆ jang tơ̆ Kŏng ti, gre ba iŏk...Hla ar hô sơ pĭnh jang tôch kơ hiôk lăp kăl kơ Chứng minh nhân dân, hla ar tơ roi hơ năn, tơ drong jang, ŭnh hnam đei kŏng chư̆ng ‘noh gơh truh tơ̆ kŏng ti bơ̆ jang bơ̆ih.”

        Kiơ̆ kơ ƀok Nguyễn Văn Cường, Phŏ Kơ dră Anih chă roi tơ ƀôh tơ drong jang dêh char Dak Lak, lơ̆m khei jăl mă I, Anih jang hlôi jang hơ dai pơ gơ̆r 26 ‘măng pơ ma dơ nuh pơm bơ̆n hla ar bơ̆ jang tơ̆ dôm apŭng, thị xăh; roi tơ ƀôh tơ drong jang ăn kơ 2.223 ‘nu. Dang ei ‘meh vă chă bơ ngai jang đơ̆ng dôm anih jang mơ dro sa lơ̆m păng ‘ngoăih dêh char tôch kơ lơ.

        “Kơ sô̆ dôm anih jang mơ dro sa chih măt chă bơ ngai jang kiơ̆ anih jang tôch kơ lơ, truh khei ‘năr âu hlôi đei hloh 2 rơ bâu anih jang mơ dro sa chih măt, lơ̆m noh ‘meh vă chă bơ ngai jang ‘ngoăih dêh char tôch kơ lơ hăm akŏp ‘meh vă chă bơ ngai jang truh dang ei ‘noh hloh 22 rơ bâu ‘nu. Găh ‘meh vă chă bơ ngai jang lơ̆m dêh char truh khei ‘năr âu ‘noh dôm anih jang mơ dro sa hlôi bơ̆ jang păng chă dơ̆ng bơ ngai jang tôch kơ lơ hăm hloh 2 rơ bâu ‘nu bơ ngai jang.”

Đe kŏng nhân tŏk bŏk bơ̆ jang tơ̆ Kŏng ti jang pơ sey Đông Nam Á  găh hơ nih jang Kơ măy kơ mŏk Hòa Phú

        Ƀok Nguyễn Quang Thuân, Phŏ Kơ dră Anih vei lăng găh bơ ngai jang lĭnh jĭ rơ ka păng tơ pôl dêh char Dak Lak tơ băt, kiơ̆ đơ̆ng dăr hơ len, truh khei ‘năr dang ei đei dang 90% bơ ngai jang đơ̆ng rŏng kơ khei ‘năr brŏk tơ̆ pơ lei veh ver kơ jĭ hlôi bơ̆ jang hơ lơ̆k dơ̆ng tơ̆ dôm dêh char găh pơ băh. Kơ sô̆ bơ ngai jang kư̆ kă uơ oei dơ̆ng kŭm tŏk bŏk đei khŭl kơ dră tơ ring păng rim anih jang kơ pal tơ gŭm, tơ goăt hrôih vă tơ chă đei tơ drong jang. Ƀok Thuân akhan, hăm anih jang chă bơ ngai jang tŏk bŏk đei ƀôh nhen dang ei, tơ drong vei sơ đơ̆ng trong tơ lĕch jang tơ chă ăn tơ drong jang ăn kơ dang 40.000 ‘nu, lơ̆m noh ăn năm jang tơ̆ teh đak đe 1.000 ‘nu lơ̆m sơ năm 2022 ‘noh jĭ tơ drong ‘lơ̆ng.

“Nhôn hơ tŏk loi dơ̆ng tơ drong jang tơ roi tơ băt păng dang ei lơ anih jang mơ dro sa kŭm hlôi pơ kăp gô pơ gơ̆r tơ drong pơ jing dôm tơ drong tơ roi tơ̆ dôm xăh. Mă 2 ‘noh hăm bơ ngai jang đei ‘meh bơ̆ jang lơ̆m dêh char ‘noh dang ei nhôn hlôi kĭ pơ kăp păng pơ ma dơ nuh hăm kŏng ti Taek wang, jĭ 1 anih jang gô pơ gơ̆r ming man tơ̆ hơ nih jang kơ măy kơ mŏk Hòa Phú păng ‘meh  vă chă bơ ngai jang đơ̆ng đe sư lơ̆m sơ năm 22-23 dang 5 rơ bâu ‘nu. Trong jang mă 3 ‘noh nhôn akhan athei kăl tŭn pran pơ trŭt tơ mơ̆t jên jang vă lơ anih jang FDI gô pơ̆ih să tơ drong jang đang kơ ‘noh tơ mơ̆t jên jang lơ̆m Dak Lak vă tơ chă ăn tơ drong jang. Nhôn akhan kŭm kăl athei yak truh ‘noh jĭ chă tơ drong jang kơ dih đơ̆ng bơ ngai jang lơ̆m noh tơ gŭm jên vă  đe sư chă jang sa kơ dih, tơ chă tơ drong jang kơ dih kŭm nhen pơ̆ih să tơ drong jang ăn bơ ngai nai.”

Nam Trang: Chih

Thuem: Tơ blơ̆