Kơsơ̆ năr 23/10, tơ̆ Hop akŏm 'măng mă 2 Anih jang Tĭnh uy Đăk Lăk, Ƀĭ thư Tĭnh uy Lương Nguyễn Minh Triết ră hơdah, athei sơkơ̆t hơdah sơnong jang tơm, tơbang hơdah dôm anih kăl kơ jăl jang 2025–2030. Tơroi ah hop akŏm ăn ƀôh, đơ̆ng blŭng sơnăm truh dang ei, GRDP kơ dêh char tŏk jê̆ 7%; tơmam drăm tĕch ăn teh đak đe đei yua hloh 2,3 tih đôlar, tŏk 37,8% pơtêng hăm khei năr ou sơnăm sơ̆. Tơmơ̆t lơ̆m jên mong teh đak đei jê̆ 13 rơbou tih hlj, hơtŏ 97% tơdrong pơkăp Trung ương pơjao.

Anih jang Tĭnh uy drơ̆ng nơ̆r chih akŏm Tơdrong pơm jang kơ Hop akŏm kiơ̆ pơkăp “6 hơdah”: hơdah gah tơchơ̆t, hơdah gah tơdrong jang, hơdah gah bơngai, hơdah gah sơnong jang, hơdah khei năr păng hơdah gah tơmam drăm pơm tơlĕch. Ƀĭ thư Tĭnh uy Đăk Lăk pơgơ̆r hăm rim anih jang dah tenh kuăng keh đang Pơkăp kơ dêh char, hơlen dôm tơdrong jang hơdrol, jên asong pơm jang. Lơ̆m noh, hơtŏk pơih să gah trong sơlam vih vơ̆t bri- đak dơsĭ rok kiơ̆ jăl trong 29 đei sơkơ̆t jing tơdrong jang dơnơm, akŏm um pơtih kăp gĭt kơ jăl jang.