VOV4.Bahnar - Ƀơ̆t tơbăt 'Năr pơjing teh đak năr 2/9, Jơnŭm chih hla bar tơroi dêh char Đăk Lăk hlôi pơgơ̆r pơjao 2 tŏ hnam 'mêm kơ eng ăn dôm unh hnam hin dơnuh tơ̆ apŭng M’Drăk. Kiơ̆ kơ noh, dôm anih jang hlôi pơjao hnam ăn pơmai H’Biêr Byă, jing bơngai mĕ hơdrô̆ tơ̆ pơlei Ea Lai (xăh Krông Jing), păng pơjao hnam ăn unh hnam 'nhŏng Lê Đức Tường, unh hnam hin dơnuh tơ̆ thôn 3 (xăh Ea H’Mlay). Rim tŏ hnam xă jê̆ 80 m2, jên huach ming man hloh 100 rơtuh hlj; lơ̆m noh Anih jang Unh hơyuh Đăk Lăk tơgŭm 50 rơtuh hlj, kơsô̆ jên nai noh kơyuơ Jơnŭm chih hla bar tơroi Đăk Lăk, jơnŭm pơgơ̆r tơring, jơnŭm jang tơpôl tơ̆ tơring păng unh hnam chă tơra. Đơ̆ng rŏng jê̆ 4 khei pơm jang, rim tŏ hnam hlôi keh đang păng pơjao ăn unh hnam trŏ ăh 'măng tơbăt Năr pơjing teh đak năr 2/9 xơnăm âu.

Vih oei tơ̆ hnam 'nao, pơmai H’Biêr Byă ƀrơ̆k kơ jơhngơ̆m: “Gơnơm đei jên đơ̆ng măt trâ̆n păng dôm anih jang 'mêm bơnat tơgŭm noh unh hnam inh hlôi đei hnam kơjăp 'lơ̆ng bơih. Đơ̆ng dang ei unh hnam inh gô adrin bơ̆ jang lơ hloh vă đei iŏk yua ăn erih xa rim kơ năr, ăn tơdrong erih tơnăp hloh”.

Tơblơ̆ nơ̆r: Lan