Kiơ̆ đơ̆ng Dơnŏ anĭh vei lăng kon kông Đăk Lăk, lơ̆m dêh char hrei au đei vă jê̆ 1.000 ‘nu bơngai đei kon pơlei yom lơ̆m kon kông. ‘Nau dôm bơngai erĭh sa lơ̆m pơlei pơla, băt hlôh tôm tơdrong lơ̆m tơdrong joăt joe păng oei sa kơ kon kông, pơm jŭk yŭk trong hơlau lơ̆m chŏh jang sa oei sa ‘lơ̆ng kơ ŭnh hnam păng kon pơlei.

Lơ̆m dôm sơnăm au ki, dôm bơngai đei kon pơlei yom hlôi jing dôm bơngai tơm, ‘nŏh gơng tơrŏh klŏh klĕch ƀar păh kơdră tơring hăm kon pơlei rim hơdrung, tơgop tĭh tên lơ̆m bơ̆ jang chă pơrô̆ pơrôp kon pơlei kon kông tơ iung pơjing Đảng, Kơdră tơring, khŭl jang chĭnh trĭ tơ̆ Đăk Lăk. Tơ̆ hop akŏm, rim bơngai tang măt hlôi chă pơma dơnŭh, tơbăt dĭh băl trong jang hơ iă lơ̆m tơdrong atŏk hơnăp jang kơ bơngai đei kon pơlei yom lơ̆m rim tơdrong jang atŏk tơ iung mŭk drăm-tơpôl, vei kơ jăp tơdrong oei sa jŏh ayŏ ‘lơ̆ngh liĕm joăt joe, sơđơ̆ng chĭnh trĭ păng sơđơ̆ng tơpôl lơ̆m tơring. Jơ ‘năr au, dêh char Đăk Lăk hlôi pôk pơ ư 100 ‘nu bơngai đei kon pơlei yom ‘lơ̆ng hlŏh sơnăm 2022.