VOV4.Bahnar - Kơ sơ̆ (15/5), Khul druh dăm Việt Nam dêh char Dak Lak păng Khul ƀok thây pơ gang mơ lôh dêh char pơm lêh pôk pơ ư đe ƀok thây pơ gang mơ lôh dêh char Dak Lak sơ năm 2022, pôk pơ ư 32 ‘nu ƀok thây pơ gang mơ lôh đei lơ tơ drong tơ gop hăm anih jang pơ gang, hơ păh tơ mam ăn 2 ‘nu ƀak si mơ lôh đei tơ drong arih xa mơ mat tat.

Pôk pơ ư đe ƀok thây pơ gang mơ lôh jang rơ gei

Tơ̆ tơ drong jang, đe ƀak si mơ lôh roi tơ ƀôh lơ tơ drong adrin jang păng dôm tơ drong mơ mat tat mưh bơ̆ jang, mă loi ƀât jĭ Covid-19 oei tơ pŏh tôch dêh ki. Đe ƀok thây pơ gang oei mơ lôh pơ ma tơ lĕch đon hơ pơi ‘mĕh ‘nŏh jĭ kon pơ lei hơ tŏk đon kơ chăng tang găn jĭ, kŭm hăm anih jang pơ gang jang ‘lơ̆ng tơ drong vei lăng jơ hngâm pran, pơm sơ đơ̆ng tơ drong arih xa.

Dơ̆ng: Tơ blơ̆