VOV4.Bahnar - Anih jang đoan Dak Lak ‘nao pơ gơ̆r pôk pơ ư druh dăm rơ gei pơm kiơ̆ nơ̆r Ƀok Hô sơ năm 2022. Tơ drong jang oei pơ gơ̆r lơ tơ drong nhen pơ dă hla ar “Đŏk păng hŏk pơ hrăm đĭ jơ hnơr kiơ̆ jơ hngâm đon ‘lơ̆ng đơ̆ng Ƀok Hô ‘mêm kơ eng”, tơ lĕch tơ drong đŏk hla ar online kiơ̆ đơ̆ng pơih mã QR. Dôm bơ ngai tang măt oei pơ ma nuh hăm druh dăm rơ gei lơ̆m hŏk pơ hrăm păng jang kiơ̆ nơ̆r Ƀok Hô.

Pôk pơ ư đe druh dăm rơ gei hŏk pơ hrăm păng jang kiơ̆ nơ̆r Ƀok Hô

Ƀlep ƀât ‘măng mă âu, Anih jang đoan Dak Lak pơ gơ̆r hơ păh tơ mam ăn tơ drong Thi pơ chĕh um rup păng ƀai hơ ri vă roi tơ băt ăn Hop akŏm Đoàn TNCS Hồ Chí Minh dêh char Dak Lak ‘măng mă XII; pơm kiơ̆ nơ̆r pơ jao đơ̆ng Khul kơ dră chĕp kơ̆l Trung ương Đoàn hơ păh tơ mam Lý Tự Trọng ăn kăn ƀô̆ Đoàn rơ gei đei jơ nei ‘lơ̆ng; pôk pơ ư 45 ‘nu druh dăm rơ gei lơ̆m tơ drong hŏk pơ hrăm păng jang kiơ̆ nơ̆r Ƀok Hô tơ̆ dêh char Dak Lak.

Dơ̆ng: Tơ blơ̆