VOV4.Bahnar - Gơ măng ‘năr 30/8, Anih jang đoàn dêh char Dak Lak pơ gơ̆r lêh Mít tinh Năr ĭnh ‘mêm kơ teh đak nhôn păng Pôk pơ ư 69 ‘nu bơ ngai, khŭl tơ pôl hơ gei lơ̆m rim tơ drong jang đoàn. 69 khŭl tơ pôl păng bơ ngai đei pôk pơ ư hloh 7 tơ drong jang ‘noh jĭ: Kang ƀô̆ Khŭl hơ gei; Hơ druh tơ dăm arih ‘lơ̆ng; Hơ druh tơ dăm tơ iung tơ drong jang sa hơ gei; hơ druh tơ dăm kon kông, hơ druh tơ dăm lui khop hơ gei. ‘Nâu jĭ dôm bơ ngai đei lơ tơ gop lơ̆m tơ drong jang đoàn păng tơ drong jang hơ druh tơ dăm tơ̆ dôm tơ ring, tơ ƀôh đei hơ năp jang hơ drin, jang tơ năp kơ sơ năm mơ lôh lơ̆m dôm tơ drong jang, tơ roi găh trong arih ‘lơ̆ng rŏ, pơm jŭk yŭk trong hơ lâu lơ̆m đoàn viên, hơ druh tơ dăm.

Dak Lak pôk pơ ư hơ druh hơ druh tơ dăm arih ‘lơ̆ng

‘Măng âu, Khŭl vei lăng hơ druh tơ dăm Việt Nam dêh char Dak Lak hlôi pơ jao 2 kơ suơ̆t jên tơ iung tơ drong jang sa đei kơ jă 40 triệu hlak jên ăn 2 hơ druh tơ dăm tơ̆ apŭng Lắk păng Krông Năng; pơ jao tơ mam hơ păh pơ long Tơ roi tơ băt ƀai hơ ri kach mang, hơ druh tơ dăm hơ ri brông păng tôn reh tĭng nĭng chĭng klơk păng pơ tôch Năr Ĭnh ‘mêm kơ teh đak nhôn dêh char Dak Lak sơ năm 2022 hăm lơ tơ drong jang ‘lơ̆ng hơ iă.

Thuem: Tơ blơ̆