Kơsơ̆ brei (20/10), Khul drŏ kăn mơdro sa dêh char Dak Lăk pơgơ̆r ‘măng tơƀơ̆p muh măt tơbăt 95 sơnăm Năr pơjing Khul drŏ kăn Việt Nam (20/10/1930 – 20/10/2025) păng ‘Măng pơlong Drŏ kăn mơdro sa Guăng ‘lơ̆ng ‘măng mă 3 hăm hơnăn Drŏ kăn jang mơdro sa lơ̆m Chăl atŏk tơ iung. Tơ̆ jơ tơƀơ̆p, Khul kơdră chĕp pơgơ̆r hlôi pôk pơ ư, pôk hơpăh rim khul păng rim bơngai jang ‘lơ̆ng, pôk ăn hla bơar drơ̆ng nơ̆r mơ̆t jang lơ̆m khul, adoi tơlĕch ‘măng pơlong “Drŏ kăn mơdro sa Guăng ‘lơ̆ng” hăm ‘măng pơlong hrŭk pơdjoong ao tai, pơma dơnuh păng joh hơri.

Iung pơma tơ̆ ‘măng pơgơ̆r, ƀok Y Giang Gry Niê Knơng, Kơ iĕng Kơdră chĕp pơgơ̆r Đảng dêh char, Kơdră chĕp pơgơ̆r Hơnih bơ̆ jang Mặt trận Tổ quốc Việt Nam dêh char Dak Lăk tang măt ăn hơnih bơ̆ jang Đảng dêh char hôn bơnê dôm tơdrong tơgop đơ̆ng khul drŏ kăn mơdro sa hăm tơdrong atŏk tơ iung mŭk drăm tơpôl kơ dêh char. Adoi hơpơi ‘meh vă đe drŏ kăn mơdro sa hơnơ̆ng iung jang kiơ̆ ‘lơ̆ng hloh dơ̆ng dôm tơdrong joăt joe, tơplih ‘nao tơchăr, sơkơ̆t hơdăh hơnăp păng jơhngơ̆m nuih mơng đơ̆ng kơdih lơ̆m chăl mơ̆t hơdoi păng tơplih kơsô̆.