Dôm kăn ƀô̆, bơngai pơtho, bơngai hŏk Lăm pơhrăm tơdrong hlôh vao vei sơđơ̆ng teh đak păng anih dơ̆ng kơ teh đak kŭm hăm kơdră chĕp kơ̆l dêh char, dôm anih jang pơma nuh găh dôm tơdrong lý luận păng tơpă lơ̆m tơdrong hơtŏk tơiung mŭk drăm - tơpôl hơdai hăm vei sơđơ̆ng teh đak, sơđơ̆ng tơ̆ tơ ring. Mĭnh tơdrong đei pơma hơdăh lơ̆m jơ bơ̆jang 'nŏh jĭ hơtŏk tơiung mŭk drăm athei năm hơdai hăm pơjing tơring sơlam păng hơmet kơjăp "jơhngâm đon kon pơlei".

Kiơ̆ đơ̆ng noh, hơtŏk 'lơ̆ng tơdrong hơrih sa, tơjur dơnuh, vei sơđơ̆ng tơdrong hơrih sa, pơjing tơdrong jang sa kơjăp 'lơ̆ng ăn kon pơlei, mă loi 'noh jĭ tơ̆ tơring sơlam păng tơring kon pơlei kon kông, ưh khan lăp jing hơnăp jang hơtŏk tơiung mă oei tơgop vei kơjăp tơdrong sơđơ̆ng tơ̆ tơring. Bí thư Đảng dêh char Đắk Lắk Lương Nguyễn Minh Triết pơma hơdăh, hăm trong tơlĕch jang vei lăng sơđơ̆ng tơpôl iŏk đơ̆ng blŭng hloi, mă loi 'noh jĭ dôm tơdrong jang tih, trong nơnăm gĭt kăl păng tơring kăl.