VOV4.Bahnar - Khei năr au ki, pơlei tơm Buôn Ma Thuột, dêh char Dak Lăk akŏm atŏk kơtang jang kiơ̆ kmăi kmŏk kơtơ̆ng ang, lăng trŭh tơ iung pơjing khŭl kơdră bơ̆ jang điên tư. Bơ̆ jang hăm kmăi kmŏk kơsô̆ tơ̆ pơlei tơm hlôi tơgop atŏk kơtang bơ̆ jang ‘lơ̆ng kơ rim hơnĭh bơ̆ jang Tĕh đak, atŏk kơtang tơdrong lăp đon đơ̆ng kon pơlei, hơnĭh mơdro sa.

Khŭl jang sơng iŏk păng pơdreo hô sơ pơm keh đang hla bơar kơ pơlei tơm Buôn Ma Thuột tơmơ̆t jên răt kmăi kmŏk hơgei tơgŭm ăn kon pơlei

Tơplĭh ăn kăl năm rim hơnĭh bơ̆ jang vă pơm keh đang hla bơar nhen hơdrol au sơ̆ ‘nŏh dang ei lơ kon pơlei kơ pơlei tơm Buôn Ma Thuột hlôi joăt hăm mĭnh hơnĭh jang tơ̆ tơring, phương dăh mă Khŭl sơng iŏk pơm ăn hla bơar păng pơdrĕo hla bơar  bơ̆ jang pơlei tơm Buôn Ma Thuột tơ̆ hnam bơ̆ jang kơsô̆ 27, trong Trường Chinh, pơlei tơm Buôn Ma Thuột. Mĭnh ‘nu bơngai mĭnh kơsô̆, mĭnh hơnĭh bơ̆ jang mĭnh tơdrong jang đei chĭh hơdăh. Kon pơlei năm truh ‘nŏh kang ƀô̆ pơtho tơbăt hơdăh tơdrong jang chă pơm hla bơar au to. Pơm hla bơar keh đang păng pơkă ăn jơ ‘năr năm iŏk tôch hơdăh, kơna tơdrong jang pơm hla bơar kơ kang ƀô̆ păng kon pơlei đei ƀônh ƀŏ, rơvơn hlŏh dơ̆ng. ‘Nhŏng Trần Văn Nguyên, kang ƀô̆ bơ̆ jang hơnĭh mong jên tơ̆ tơring Thống Nhất, pơlei tơm Buôn Ma Thuột, dêh char Dak Lăk hơnơ̆ng năm trŭh bơ̆ jang tơ̆ mĭnh hơnĭh jang tơbăt:“Lơ̆m khei ‘năr jĭ jăn hơnĭh jang mong jên năm bơ̆ jang sơđơ̆ng, gơnơm kmăi kmŏk kơsô̆ jang răh pơm hla bơar păng hơlen hơdăh jơ ‘năr kơna băt hơdăh tơdrong pơm hla bơar keh đang lơ liơ vă pơ prŏ jơ ‘năr năm iŏk kơsô̆ păng sơng iŏk hla bơar hô sơ”.

Sơkơ̆t hơdăh ưng yŭng kmăi kmok kơsô̆, atŏk tơdrong lăp đon kơ kon pơlei, hơnĭh mơdro sa  găh tơdrong pơm ăn hla bơar ‘nŏh tơdrong kăl hlŏh lơ̆m tơ iung pơjing tơring kơdrơ̆m gơ̆h hơgei, pơlei tơm Buôn Ma Thuôt hlôi tơplĭh ‘nao trong bơ̆ jang, tơplĭh ‘nao lơ̆m vei lăng, chĕp pơgơ̆r, tơlĕch jang rim tơdrong jang kơ Dơnŏ anĭh bơ̆ jang. Atŏk jơhngơ̆m đon jang tơnăp kơ kang ƀô̆ lơ̆m bơ̆ jang roi năr roi kơtang. Tơdrong bơ̆ jang sơng iŏk păng pơm keh đang hô sơ, hla bơar jang au to jei roi ‘lơ̆ng hơ iă, khei ‘năr pơm keh đang hla bơar roi hrôih, mă kăl đei hô sơ pơm keh đang hơdrol jơ ‘năr pơkă păng ư̆h kơ đei hô sơ hla bơar pơm keh đang klui hlŏh jơ ‘năr pơkă. Đơ̆ng nŏh tơgop gĭt kăl lơ̆m atŏk kơtang bơ̆ jang ‘lơ̆ng kơ rim hơnĭh bơ̆ jang. Mŏ Ninh Thị Thanh Thảo, kang ƀô̆ Hơnĭh jang Jên hu pơ prŏ tơdrong jang, pơlei tơm Buôn Ma Thuột, dêh char Dak Lăk tơbăt: "Jang kiơ̆ pơkăp 3,4 ‘nu kon pơlei lăp bơ̆ jang tơ̆ hnam ba kiơ̆ online đơ̆ng nŏh pơtrŭh kiơ̆ trang Web mĭnh hơnĭh jang, kang ƀô̆ jang kiơ̆ kmăi kmŏk internet sơng iŏk hla bơar hô sơ đơ̆ng nŏh hơmet pơ ‘lơ̆ng lơ̆m 3 năr đơ̆ng rŏng pơdrĕo ăn kon pơlei ‘moi kiơ̆ ƀưu điên năm ba ăn kon pơlei”.

Kiơ̆ đơ̆ng ƀok Vũ Văn Hưng, Kơdră chĕp pơgơ̆r Dơnŏ anĭh vei lăng kon pơlei kơ pơlei tơm Buôn Ma Thuột, dêh char Dak Lăk tơbăt, lơ sơnăm au ki, pơlei tơm hlôi tơmơ̆t jang răt kmăi kmŏk gơ̆h hơgei kơ Khŭl bơ̆ jang pơm ăn hla bơar păng pơdrĕo hla bơar ăn kon pơlei, pơjing đei trong jang rơvơn hlŏh ăn khŭl kơdră bơ̆ jang kiơ̆ kmăi kmok gơ̆h hơgei. Pơtôch hơlen jang kiơ̆ kmăi kmŏk dêh char Dak Lăk sơnăm 2020 kơ yuơ Dơnŏ anĭh vei lăng kon pơlei dêh char tơbăt đei ƀô̆h, tơdrong jang tơplĭh jang kơsô̆ kơ pơlei tơm Buôn Ma Thuột iŏk đei jơnei 187,67 (lơ̆m au, khŭl kơdră jang hăm kmăi kmŏk iŏk đei 113,66 điêm; jang mŭk drăm kơsô̆ 27,15 điêm; tơpôl jang kiơ̆ kơsô̆ 46,86 điêm) găh lơ̆m khŭl điêm lơ pơtêng hăm rim tơring lơ̆m dêh char. ‘Nau jing trong ƀô̆h hơdăh vă khŭl kơdră pơlei tơm hơnơ̆ng tơmơ̆t jên jang hơmet pơ ‘lơ̆ng trong jang hăm kmăi kmok kơsô̆ hlôi đei tơlĕch ăn. Ƀok Vũ Văn Hưng tơbăt: Pơlei tơm tŏk bŏk hơnơ̆ng jang kiơ̆ kmăi kmŏk kơsô̆ hăm rim tơdrong jang vă roi năr roi bơ̆ jang ‘lơ̆ng hlŏh dơ̆ng, tơgop pơtrŭt kơtang atŏk tơ iung tơring kơ drơ̆m kiơ̆ trong gơ̆h hơgei.“Kmăi kmŏk găh internet kơ pơlei tơm hrei au hlôi đei tơmơ̆t jang, răt tơmơ̆t trŏ lăp hăm trong tơlĕch ăn. Rim tơdrong jang kmăi kmŏk ‘lơ̆ng hơ iă tơgŭm ăn kon pơlei jei hlôi đei iung jang. Mă kăl, khul bơ̆ jang mĭnh hơnĭh kơ pơlei tơm păng kơ 21 tơring, phương hlôi đei răt ăn kmăi kmŏk vă đei kon pơlei vang lăng hơlen găh tơdrong bơ̆ jang pơm hla bơar au to ‘lơ̆ng kơnê̆ lơ liơ. Trong tơlĕch jang trŭh sơnăm 2025, nhôn gô jang keh đang khŭl kơdră bơ̆ jang hăm kmăi kmŏk kơsô̆”.

Buôn Ma Thuột hăm dôm tơdrong đei rơvơn hlôi đei sơkơ̆t hơdăh jing hơnĭh kơdrơ̆m tơm tơring Tây Nguyên, pơlei tơm Buôn Ma Thuột krao hơbơn rim khŭl kơdră chĕp pơgơ̆r đảng, kơdră chĕp pơgơ̆r tơring, mă kăl hăm kơdră chĕp kơ̆l iung jang kiơ̆ kơtang hlŏh dơ̆ng bơ̆ jang hăm kmăi kmŏk internet, pơjing hơyak pran kơtang đơ̆ng tơ iung pơjing khŭl kơdră bơ̆ jang kmăi kmŏk điên tư, pơjing hơyak pran ăn tơring kơdrơ̆m gơh hơgei; atŏk kơtang jơhngơ̆m đon hlô̆h vao ăn khŭl kang ƀô̆, rim hơnih bơ̆ jang, hơnĭh mơdro sa păng kon pơlei găh tơdrong iŏk đei hơ iă đơ̆ng jang kiơ̆ kmăi kmŏk internet lơ̆m bơ̆ jang vei lăng, chĕp pơgơ̆r păng atok tơ iung mŭk drăm-tơpôl.

Bơngai chih: Hương Lý

Tơblơ̆ nơ̆r: Amazưt