Đơ̆ng blŭng sơnăm truh dang ei, tơring jang mŭk drăm păng dôm hơnih  jang kŏng ngĭp lơ̆m tơring hlôi hơvơn lơ tơdrong jang 'nao gah tơdrong jang kŏng ngĭp, pơm tơlĕch tơmam drăm păng jang unh hơyuh. Kơsô̆ hơnih jang tơ̆ dôm hơnih kŏng ngĭp tŏk bŏk oei pơm jang đei pơhlom 92%. Hơnih jang mŭk drăm Pơbah Phú Yên păng dôm hơnih jang kŏng ngĭp hơvơn đei hloh 133 tơdrong jang hăm kơsô̆ jên asong jang đei pơkăp jê̆ 35.000 tih hlj. Ah jơ pơma đam, lơ tơdrong tơhlăk tăk đei tơrĕk truh hơnih jang kŏng ngĭp, thuê teh păng hla bar asong jang hlôi đei hơnih jang mŭk drăm pơtruh nơ̆r athei pơklaih vă ƀônh hiôk ăn tơdrong jang tĕch mơdro.

Kơdră Jơnŭm Vei lăng Hơnih jang mŭk drăm Pơbah Phú Yên ăn tơbăt, hơnih jang tŏk bŏk oei hơtŏk ming pơ-'lơ̆ng hla bar hanh chĭnh, chă pơtho hơdah vă hơnih jang mŭk drăm pơm hla bar gơh ƀônh ƀŏ hloh. Hăm nơ̆r athei pơih trong tơroh hăm Hơnih jang kŏng ngĭp An Phú lĕch tơ̆ trong kơsô̆ 14, hơmŏ tơdrong jang gô keh đang hơdrol kơ năr 15/7. Găh athei kla jên thuê teh lơ̆m minh 'măng, Jơnŭm Vei lăng gô jang atŭm tơroi hơdah ăn hơnih jang mŭk drăm pơm hla bar hơmet trŏ nhen tơchơ̆t. Ƀơ̆t 'măng ou, Jơnŭm Vei lăng Hơnih jang mŭk drăm Pơbah Phú Yên adoi pơjao tơchơ̆t asong jang păng hla bar pơkăp asong jang ăn 5 tơdrong jang 'nao hăm kơsô̆ jên chih măt asong jang jê̆ 1.200 tih hlj.