Đăk Lăk dang ei đei teh să, kơsô̆ măt bơngai oei lơ̆m grŭp dôm dêh char, pơlei tơm dơ̆ng hơlâu kơ jơ̆p teh đak, atŭm hăm noh jĭ anih tơroh tơm gah trong nơnăm kăp gĭt kơ Tây Nguyên; đei trong hiôk vă jang hadoi, hơtŏk tơ-iung gah mŭk drăm, joh ayŏ hŏk pơhrăm, tơpôl hăm dôm dêh char nai lơ̆m tơring Tây Nguyên, tơring tơter đak đơsĭ Tŏk bŏk păng dôm anih jang mŭk drăm pran kơ jơ̆p teh đak. Mŭk drăm hơtŏk hloh, pơtoi hơtŏk tơ-iung đei yua 8% minh sơnăm lơ̆m 20 sơnăm kơ âu. Mă kăl, Đăk Lăk oei jing anih akŏm lơ tơdrong joh ayŏ kăp gĭt khôi kră sơ̆ kơ kon pơlei 49 hơdrung kon kông atŭm hơrih jang xa, lơ̆m noh đei “Cham char joh ayŏ chĭng chêng Tây Nguyên” đei Anih jang UNESCO sơkơ̆t jing mŭk drăm kăp gĭt kơ kon bơngai.

'Nao âu, truh akŏm păng iung pơma ah Lêh tơbăt 120 sơnăm Đăk Lăk iung jing păng hơtŏk, Phŏ Thủ tướng teh đak bơ̆n Nguyễn Hòa Bình sơkơ̆t hơdah: anih dơ̆ng kăp gĭt, trong jang kơ dêh char Đăk Lăk hăm tơring păng teh đak đei sơkơ̆t hơdah lơ̆m lơ trong tơlĕch jang đơ̆ng Trung ương kiơ̆ dôm jăl jang. Hơdah hloh noh Pơkăp kơsô̆ 67 đơ̆ng Anih tơm Chĭnh trĭ gah “Pơjing păng hơtŏk pơlei tơm Buôn Ma Thuột, dêh char Đăk Lăk truh sơnăm 2030, sơkơ̆t lăng truh sơnăm 2045”; Tơchơ̆t kơsô̆ 72 đơ̆ng Kuôk hô̆i gah tơlĕch jang kăp gĭt pơjing, hơtŏk pơlei tơm Buôn Ma Thuột jing tơring kơdrơ̆m dơnơm kơ Tây Nguyên; Tơchơ̆t kơsô̆ 23 đơ̆ng Anih tơm Chĭnh trĭ gah trong jang hơtŏk mŭk drăm – tơpôl păng vei sơđơ̆ng tơpôl tơring Tây Nguyên truh sơnăm 2030, sơkơ̆t lăng truh sơnăm 2045…. sơkơ̆t hơdah sơnong jang tih tên đei pơkăp hăm dêh char Đăk Lăk noh hơtŏk mŭk drăm athei pơtrŏ hăm joh ayŏ, tơpôl, cham char vei sơđơ̆ng tơpôl; atŭm hăm 'noh, athei jing anih tơm hơtŏk tơ-iung kơ tơring.

Phŏ Thủ tướng teh đak bơ̆n Nguyễn Hòa Bình ră hơdah, vă jang đei jơnei dôm tơchơ̆t tơlĕch, anih jang Đảng, jơnŭm pơgơ̆r tơring păng tôm kon pơlei lơ̆m dêh char athei tơguăt tơguăl, hơdrin akŏm pơgơ̆r pơm jang tơnăp dôm sơnong jang tơm nhen tơ̆ hơla: “Hơvơn akŏm jơhngơ̆m pran atŭm, iŏk yua dôm mŭk drăm, tơdrong hiôk vă hơtŏk tơ-iung pran; tơplih 'nao trong jang mŭk drăm, mă dơnơm noh hơtŏk dôm tơmam choh pơtăm, jang gah bri, pơm tơlĕch tơmam drăm 'lơ̆ng vă tĕch ăn teh đak đe lơ hloh; hơtŏk tơdrong choh jang xa, jang gah bri, jang ka hơdang păng pơm tơlĕch unh hơyuh rơgoh 'lơ̆ng; pơjing tơdrong jang chĭnh trĭ hlăng 'lơ̆ng, kơjăp kơtang, pơm jang kơyuơ kon pơlei; hơtŏk mŭk drăm – tơpôl, vei lăng cham char, vei sơđơ̆ng tơdrong pơyua ăn tơpôl; vei sơđơ̆ng tơpôl teh đak păng tơ̆ tơring”.

Ƀok Nguyễn Đình Trung, jang lơ̆m Trung ương Đảng, Ƀĭ thư Tĭnh uy Đăk Lăk ăn tơbăt, lơ̆m jăl jang truh âu kơnh, atŭm hăm dôm tơdrong hiôk noh dơnơm, Đăk Lăk adoi oei đei lơ tơdrong tơnap tap mă tôm anih jang chĭnh trĭ lơ̆m dêh char athei tơ-iung, chĕp vei tơdrong băt 'mêm kơ teh đak, jơhngơ̆m pran tơguăt tơguăl tôm kon pơlei, iŏk yua mŭk drăm tơdrong pran; tơgenh tơdrong tơgŭm đơ̆ng Đảng, Teh đak, tơdrong tơgŭm đơ̆ng rim anih jang mŭk drăm păng tôm kon pơlei; băt hơdah, tôm tơdrong păng pơm kiơ̆ tơnăp tơchơ̆t  “Hơtŏk mŭk drăm jing sơnong tơm, pơ-'lơ̆ng Đảng jĭ sơnong dơnơm hloh, pơjing anih jang chĭnh trĭ hlăng 'lơ̆ng kơjăp kơtang, bot pơm jang đei jơnei; vei lăng păng hơtŏk joh ayŏ ƀenh kơ um ai kon pơlei kon kông jing tơdrong dơnơm kơ tơpôl, pơjing jơhngơ̆m pran ăn hơtŏk tơ-iung kơjăp sơđơ̆ng; vei sơđơ̆ng tơpôl jing tơdrong jang kăl hloh păng athei jang ling lang”: “Đảng ƀô̆, jơnŭm pơgơ̆r tơring, khul linh păng kon pơlei kon kông dêh char Đăk Lăk pơkăp gô pơtoi hơtŏk tơdrong juăt jue kăch mang nuih mơng păng đon bơnôh 'mêm kơ teh đak; tơgĭt păng vei lăng dôm tơdrong jang đei jơnei mă jơhnơr mih ma hlôi pơm jang đei; tơguăt minh ƀơ̆r đon, hơdrin găn hloh tơnap tap, khŏm mă pơjing dêh char Đăk Lăk hơtŏk tenh, kơjăp sơđơ̆ng, roi năr roi pơdrŏng pran, gơh hơgei, ƀenh kơ joh ayŏ kon pơlei; tơgop kơjăp atŭm hăm teh đak yak tŏk ah chăl sơnăm 'nao – jơhnơr hơrih hơtŏk tơ-iung kơ kon pơlei  Việt Nam.”

Iŏk yua mŭk drăm, tơdrong pran kơ tơring teh ƀenh kơ juăt jue kơ hnưr hơrih, akŏm đei kơjă joh ayŏ juăt jue kơ tôm kon pơlei đơ̆ng jơ̆p tơring kơ teh đak; anih dơ̆ng kăp gĭt păng jĭ anih dơnơm hơtŏk tơ-iung kơ tơring Tây Nguyên; hăm dôm tơdrong đei pơsư̆ hiôk gah cham char plenh teh, dêh char Đăk Lăk tŏk bŏk oei grŭn iung khŏm mă pơjing tơring roi năr roi pơdrŏng jơnap, gơh hơgei păng sơnêp sơnua.