Vang truh hop akŏm đei 250 ‘nu bơngai tang măt ‘nŏh jĭ kăn ƀô̆ jang găh tơdrong lui khop, đe ƀok soi, bơngai pơtho lui, bơngai jang lơ̆m Khul ƀok soi găh Tơring khop Ban Mê Thuột păng Tơring khop Quy Nhơn.

Dôm bơngai tang măt đei roi tơƀôh trong jang, tơdrong tơgŭm đơ̆ng Đảng, Teh đak; dôm tơdrong ‘nao đơ̆ng Luơ̆t lui khop sơnăm 2026; tơdrong pơvei đơ̆ng teh đak Việt Nam păng Hnam khop tơm Vatican; hơnăp jang đơ̆ng Khul lui Công giáo Việt Nam lơ̆m tơdrong pơjing tơdrong pơvei, tơguăt đĭ đăng hơdrĕch hơdrung.

Kiơ̆ ƀok Nguyễn Tiến Trọng, Phŏ kơdră Anih vei lăng tơdrong lui khop kơ Khul kơdră teh đak, Luơ̆t lui khop sơnăm 2026 đei yoa đơ̆ng ‘năr 1/1/2027. Tơdrong roi tơƀôh tơdrong hơgăt ‘nao gô pơm hơtŏk tơdrong đei yoa mưh jang hơdoi đơ̆ng khul kơdră pơgơ̆r tơring hăm dôm khul lui mưh tơlĕch dôm trong jang đơ̆ng teh đak.