Vă rim bơngai tah hla adoi gơh năm tah kơphĭu tơtom trŏ tơchơ̆t, Kŏng an dêh char Đăk Lăk sơkơ̆t hơdah chih akŏm hơnăn bơngai tah hla jing tơdrong kăp gĭt. Hơnih jang kơchăng jang kơjăp hăm Hơnih pơgơ̆r pôk rơih lơ̆m tơdrong dôm jăl lơ̆m tơdrong hơlen lăng păng chih akŏm yư lĭu kon pơlei pơla.

Tơdrong tơm noh athei pơm kiơ̆ sô̆ hoă yư lĭu, drơ̆ng minh gah tơroi tơbăt đơ̆ng tơring hăm hơnih chih akŏm kơ teh đak gah tơring oei xa, kiơ̆ đơ̆ng noh tơjur ƀiơ̆ tơdrong yoch, le lăi dah mă chih ưh kơ tôm hơnăn bơngai tah hla. Tơdrong iŏk yua yư lĭu sô̆ ưh hơdrô̆ hơtŏk trŏ hơdah lơ̆m chih hơnăn bơngai tah hla mă oei pơm trong hiôk lơ̆m chă in tơlĕch, asong the kư tri, vei sơđơ̆ng ăn rim bơngai adoi iŏk jang sơnong năm pôk rơih kơ po.  

Kŏng an dêh char Đăk Lăk hlôi pơtơm pơjing 10 khul pơm jang hăm hloh 300 kan ƀô̆ linh kơtă năm truh 102 xah, phương vă băt hơdah tơdrong, tơtom sek tơlang dôm tơdrong đei ƀôh, mă kăl noh tơ̆ dôm tơring kăp gĭt.