Phŏ Kơdră Kuô̆k hô̆i, Thượng tướng Nguyễn Doãn Anh atŭm hăm lơ bơngai tang măt ăn rim hơnih jang tơm, hơnih jang Trung ương năm akŏm lêh pơdong tơ̆ Pơsat ƀlŏk tơbăt kơ linh lôch tang dêh char Đăk Lăk. Kiơ̆ Jơnŭm pơgơ̆r gah chă sir kôch akŏm păng sơkơ̆t hơdah hơnăn kơting linh lôch tang dêh char Đăk Lăk, đơ̆ng rŏng jê̆ 7 khei chơ chă lơ̆m bri, găn kông krang hang nak kơ dêh char Mondulkiri, teh đak Campuchia, đe kang ƀô̆ linh Khŭl K51 hlôi chơ chă sir kôch 27 kơting linh lôch tang 'nhăk vih tơ̆ teh đak.

'Nou jĭ dôm kơting linh lôch tang tam mă băt hơnăn măt. Đại tá Đinh Văn Hưng, Chĭnh uy kơ Hơnih tơm vei lăng Khŭl linh dêh char Đăk Lăk ăn tơbăt, tơdrong đei yua ou jĭ tơdrong hơdrin tih tên đơ̆ng đe kang ƀô̆ linh dêh char, mă kăl noh Khŭl K51 lơ̆m khei năr tŏ 'mi kial ưh đei sơđơ̆ng, tơring hli hlơt, kơtơ̆ng ang ưh đei truh tom.