VOV4.Bahnar - Khei năr au, hơnĭh tĕch mơdro ƀĕng Trung thu tơ̆ Dak lăk rơ ông rơ ang hăm lơ kơ loăi ‘lơ̆ng liĕm pơkă ăn mĭnh pơyan Trung thu chơt hơ iă ‘nă hal hlŏh đơ̆ng rŏng 1 sơnăm rơheng kơ kot kơ yuơ jĭ hơbŭh Covid-19.

Khŭl bơ̆ jang vei lăng mơdro sa dăr lăng ƀĕng trung thu tơ̆ hơnĭh tĕch mơdro lơ̆m pơlei tơm Buôn Ma Thuột

VOV4.Bahnar - Hlŏh 1 giĕng au, lơ̆m rim trong kơphô̆ tơ̆ pơlei tơm Buôn Ma Thuột nhen Lê Thánh Tông, Lê Hồng Phong, Phan Bội Châu, Phan Chu Trinh... lơ hơnĭh tĕch mơdro ƀĕng Trung thu hlôi đei pơjing, pơdă ‘lơ̆ng liĕm. Tŏk bŏk rơ̆ih răt ƀĕng Trung thu ăn ŭnh hnam, ƀok Bùi Minh Chánh, oei tơ̆ phường Tân Lợi, pơlei tơm Buôn Ma Thuột, dêh char Dak Lăk tơbăt, rim kơ loăi ƀĕng đei hơnăn tĕch mơdro tơ̆ au ‘nŏh jing ƀĕnh mă ŭnh hnam rơ̆ih răt:“Rim sơnăm ĭnh rơ̆ih răt dôm ƀĕng Trung thu ‘lơ̆ng, băt hơnĭh pơm tơlĕch. Sơnăm au ĭnh ƀô̆h ƀĕng hăp măt ƀiơ̆ pơtêng hăm rim sơnăm, đei pơm tơlĕch ‘lơ̆ng kơ măt, lơ kơ loăi.”

Sơnăm au, rim hơnĭh tĕch mơdro chă tĕch mơdro dôm tơmam drăm pơm tơlĕch ‘lơ̆ng nhen Kinh Đô, Yến Sào Khánh Hòa, BiBica... păng ƀĕng kơ tơring nhen Hà Nội, Thành Phát hăp tĕch mơdro lơ lơ̆m ‘măng Trung thu au. ‘Ngoăih ƀar kơ loăi ƀĕng tơm ‘nŏh ƀĕng tơyông păng ƀĕng phang oei đei ƀĕng ‘măn ăn dôm bơngai giĕng sa ‘nhĕm, hăm đei lơ kơ loăi nhen găr sen, tơ̆h pra, ƀum trâu, mè đen hạt dưa, nhân mềm, thập cẩm, hạnh nhân, nhŭng phang, vi cá jambon, iĕr pham jambon kơtăp iĕr pơ iŭ ....  

Ư̆h khan lăp tơdrong ‘lơ̆ng kơ rim ƀĕng, bơngai răt yua roi năr roi rơ̆ih hlŏh dơ̆ng lơ̆m tơdrong tơpu ‘lơ̆ng vă pôk ăn dĭh băl lơ̆m khei ‘năr au. Yă Nguyễn Thị Bích Phương, vei lăng hơnĭh tĕch mơdro Ngọc Khánh 2, trong Phan Bội Châu, phương Tân Tiến, pơlei tơm Buôn Ma Thuột tơbăt:“Ƀar sơnăm hơdrol ‘nŏh jĭ hơbŭh kơna nhôn đei ƀĕng tŏ sĕt, mă lei sơnăm jĭ hơbŭh đĭ bơih kơna nhôn hlôi răt tơmơ̆t lơ kơ loăi ƀĕng ‘lơ̆ng vă tĕch mơdro ăn kon pơlei, nhen hơnĭh pơm tơlĕch ƀĕng Kinh Đô, Bibica păng Đồng Khánh dơ̆ng”

Mĭnh hơnĭh tĕch ƀĕng trung thu tơ̆ trong Lê Thánh Tông - thành phố Buôn Ma Thuột

Lơ tơ ‘ngla hơnĭh tĕch mơdro tơbăt, ƀĕng Trung thu sơnăm au kơ jă tŏk đơ̆ng 3.000-5.000 hlak jên lơ̆m 1 tŏ pơtêng hăm lơ sơnăm. Kiơ̆ đơ̆ng hơnĭh pơm tơlĕch tơbăt akhan, kơ yuơ kơ jă tơmam drăm vă pơm tơlĕch ƀĕng măt kơna pơm ăn tĕch mơdro ƀĕng măt ƀiơ̆. Mŏ Phạm Thị Chúc Giang, tơngla hơnĭh tĕch mơdro ƀĕng keo Phương Hoa tơ̆ trong Y Jut, pơlei tơm Buôn Ma Thuột tơbăt, jô̆ hơtŏ mĭnh tŏ ƀĕng Trung thu kơ jă đơ̆ng 60.000 trŭh 75.000 hlak jên. Hăm dôm kơ loăi ƀĕng ‘lơ̆ng gĭt kăl ‘nŏh trŭh 3 trĭu hlak jên lơ̆m 1 kơ hôp (4 tŏ ƀĕng). Jei kiơ̆ đơ̆ng mŏ Giang, khei năr au, đe chă răt oei tŏ sĕt:“Hơnĭh tĕch mơdro nhôn au hlôi mơdro sa hlŏh 10 sơnăm, pơtêng hăm sơnăm sơ̆ ‘nŏh sơnăm au mĭnh ƀar tơmam drăm tŏ măt ƀiơ̆, trŭh dang ei tơdrong đe chă răt tim gan lơ, hơpơi mĭnh ƀar năr kơnh gô đei lơ hlŏh ƀiơ̆.”

Vă vei lăng năng tông ăn bơngai răt yua lơ̆m chă răt păng rim khŭl, rim hơnĭh pơm tơlĕch tĕch mơdro tơpăt ‘lơ̆ng, Dơnŏ anĭh vei lăng mơdro sa dêh char Dak Lăk tŏk bŏk pơgơ̆r jang năm dăr lăng hơdrol, lơ̆m păng đơng rŏng Tết Trung thu 2022. Atŭm hăm ‘nŏh, lơ̆m blŭng khei 9, dêh char Dak lăk gô gô iung jang dăr lăng tơ 6 apŭng, thĭ xăh păng pơlei tơm lăng hơlen tơdrong pơm kiơ̆ rim tơdrong tơchơ̆t khôi luơ̆t găh rơgŏh ‘lơ̆ng tơmam drăm lơ̆m dêh char. Ƀok Trần Văn Tiết,  Kơ iĕng kơdră Hơnĭh vei lăng Rơgŏh ‘lơ̆ng tơmam drăm sa Dak Lăk tơbăt:“Nhôn gô akŏm dăr lăng hăm dôm tơmam drăm iŏk yua lơ̆m năr Têt Trung thu nhen ƀĕng, mư̆t, keo, ƀier, hơlăk, đak ‘ngam. Gômơ̆ng kiơ̆ pơm hlăi kơna pơlăp rim trong phak. Hăm dôm hơniưh pơm tơlĕch ư̆h kơ đei hla bơar ăn asong ‘nŏh gô iŏk tơvĭh hla bơar ăn asong jang, păng dôm hơnĭh pơm tơlĕch đei hla bơar ăn asong gơ̆h pơm tơlĕch sơđơ̆ng rơgŏh tơmam drăm ư̆h kơ tơroi tơbăt tơmam drăm kơ dĭh ‘noh jei xek phak mơ̆n. Lơ̆m khei ‘năr pơm tơlech, tơdăh đei iŏk yua dơ̆ng rim tơmam drăm anai ư̆h kơ rơgŏh ‘lơ̆ng ‘nŏh gô akŏp hơgrop lơ̆m xek tơlang rim tơdrong pơm glăi.”

Bơngai chĭh: Nam Trang

Tơblơ̆ nơ̆r: Amazưt