Tơdrong hơdăh kăl kơ lăng truh ‘noh jĭ jên tĕch tơmam tơ̆ teh đak đe hlôi jang đei păng yak hloh trong tơlĕch jang pơđĭ sơnăm, pơm tơdrong ‘lơ̆ng gĭt kăl ăn jăl hơtuch sơnăm. Akŏm jên tĕch tơmam tơ̆ teh đak đe 9 khei hơdrol đei hloh 2,3 ti USD, tŏk hloh 37% pơting hăm khei ‘nâu sơnăm 2024 păng yak hloh trong tơlĕch jang pơđĭ sơnăm. Tơmang lăng kŭm tŏk tôch kơ lơ hăm akŏm iŏk đei jô̆ pơhlom hloh 11.465 ti hlak jên, tŏk 81%. Tơdrong jang tĕch mơdro, pơvih pơvăn hơnơ̆ng tơplih ‘lơ̆ng, akŏm kơsô̆ tĕch le tơmam păng iŏk đei đơ̆ng pơvih pơvăn răt yua jô̆ pơhlom đei vă jê̆ 139 rơbâu ti hlak jên, tŏk 14%.

Vă iŏk đei tŏk pơđĭ sơnăm 8%, Anih vei lăng kon pơlei dêh char băt hơdăh tŏk mŭk drăm tơpôl atŭm lơ̆m dêh char jăl khei mă IV athei tŏk hloh 10%. Ƀok Tạ Anh Tuấn, Kơdră Anih vei lăng kon pơlei dêh char Đắk Lắk athei rim anih jang, tơring athei akŏm tŭn hrĕnh tơlĕch jên tơmơ̆t jên jang teh đak, mă loi ‘noh jĭ dôm tơdrong jang tơm; tŭn hrĕnh chă bơngai răt teh mong vă jang đang tơdrong hơgăt thu mong jên jang teh đak; hơdai hăm hơmet pơ ‘lơ̆ng pơmat tat ăn dôm tơdrong jang ‘ngoăih kơ jên teh đak; tŭn pran hơmet ming hla ar bơ̆jang păng vei sơđơ̆ng ‘lơ̆ng.